Stray Kids хамтлагийн Ли Ноу 2027 онд цэргийн алба хаахаар болжээ

K-pop хамтлаг Stray Kids-ийн гишүүн Ли Ноу ирэх оноос цэргийн албаа хааж эхлэхийг хамтлагийн харьяалагддаг JYP Entertainment агентлаг арваннэгдүгээр сарын 5-нд олон нийтийн сүлжээн дэх албан ёсны хуудсаараа зарлажээ.

Агентлагийн мэдээлснээр, Ли Ноу 2027 оны эхний улиралд цэргийн албандаа явах тул тэр үеийн зарим арга хэмжээнд оролцохгүй байж магадгүй. Харин цэрэгт явахаасаа өмнө янз бүрийн контент, бие даасан үйл ажиллагаагаараа фэнүүдтэйгээ холбоо барьсаар байна.

Цэрэгт явах тодорхой өдөр, алба хаах хэлбэрийг хараахан зарлаагүй байна.

Ли Ноу хамтлагийн гишүүдээс анх удаа цэргийн алба хаах гэж байгаа нь онцгой анхаарал татлаа. 1998 онд төрсөн тэрбээр 2027 онд 29 нас хүрнэ.

“Цэргийн алба хаах бол зүй ёсны үүрэг гэж би боддог. Намайг дуудахад надад өгсөн үүргийг үнэнчээр биелүүлнэ” гэж тэрбээр наймдугаар сард шинэ цомгоо танилцуулах хэвлэлийн бага хурлын үеэр хэлж байжээ.

Өмнө нь BTS хамтлаг гишүүдийнхээ цэрэгт явах хуваарийг уялдуулж, бүтэн бүрэлдэхүүнээр ажиллахгүй хугацааг багасгахыг зорьж байсан юм. Долоон гишүүн бүгд нэг жил орчмын дотор цэргийн албаа эхэлсэн бөгөөд цэрэгт явахаасаа өмнө болон алба хааж байх хугацаандаа бие даасан цомог гаргаж идэвхтэй ажилласан.

Гишүүд цэргийн албаа дуусгасны дараа BTS тав дахь студийн цомог “ARIRANG”-аа гаргаж эргэн иржээ. Энэ нь хамтлагийн бараг дөрвөн жилийн дотор бүрэн бүрэлдэхүүнээрээ гаргасан анхны цомог юм.

13 гишүүнтэй SEVENTEEN хамтлаг харин гишүүдийнхээ цэрэгт явах хугацааг шат дараалан хуваарилж, бие даасан болон дэд хамтлагийн үйл ажиллагаагаа үргэлжлүүлж байна. Жонхан 2024 онд хамгийн түрүүнд цэрэгт явсан бол бусад гишүүд түүний араас ээлжлэн явсан байна.

Stray Kids 2018 онд анх гарч ирснээс хойш дэлхий даяар нөлөөгөө тэлсэн. Хамтлаг 2022 оны “Oddinary” цомгоос эхлэн АНУ-ын Billboard 200 жагсаалтад дараалсан есөн цомгоо тэргүүн байрт оруулсан нь 21 дүгээр зуунд гарч ирсэн хамтлагуудын дундах дээд амжилт юм.

Ли Ноу цэрэгт явсны дараа голчлон хамтлагаараа ажиллаж ирсэн Stray Kids бие даасан төслүүдээ өргөжүүлэх эсэх нь одоо анхаарлын төвд байна. Бусад гишүүд ч түүний араас цэрэгт явж болзошгүй тул хамтлагийн үйл ажиллагаа тасалдах үеийг хэрхэн давах нь гол сорилт болно.