Суданд дайн, ган гачгийн улмаас хүүхдийн хоол тэжээлийн дутагдал нэмэгдэж байна
Олон гэр бүл эмчилгээний зардлаас айж, хүүхдээ хүнд болтол нь эмнэлэгт хүргэдэггүй.
Суданд 2023 оны 4 дүгээр сараас үргэлжилж буй иргэний дайн, уур амьсгалын өөрчлөлтийн нөлөөгөөр олон эцэг эх хүүхдээ хооллож чадахгүй байгааг Аль Жазира телевиз мэдээлжээ.
Аль-Лалуба тосгоны Лайла Али хоол тэжээлийн хүнд дутагдалд орсон таван настай хүү Адамаа хоёр цаг хагас замыг туулж Порт Судан хотын эмнэлэгт хүргэжээ. «Энэ удаа хүүгээ үхчих вий гэж айсан болохоор эмнэлэгт авчирсан» гэж тэрбээр хэлэв.
Хүнсний аюулгүй байдлын үе шатын нэгдсэн ангиллын тооцоогоор 2026 онд таван хүртэлх насны 825 000 хүүхэд цочмог хүнд хоол тэжээлийн дутагдалд орох нь 2025 оныхоос 7 хувиар их юм. НҮБ-ын Хүүхдийн сан болон түншүүд энэ оны эхний зургаан сард улс даяар ийм 174 700 хүүхдийг эмчилжээ.
Порт Судангийн сургалтын эмнэлгийн 17 ортой тасагт нэг орон дээр гурван хүүхэд хэвтэж байгаа нь өвчин тархах эрсдэлийг нэмэгдүүлж байна гэж хоол тэжээлийн зөвлөх Марьям Гадалсид хэлжээ. Тус эмнэлэгт энэ оны 1-8 дугаар сард 433 тохиолдол бүртгэгдсэн байна.
Дарфурын бүс нутаг дахь байдал ялангуяа хүнд байна. НҮБ-ын Хүүхдийн сангийн мэдээллээр Хойд Дарфурт 2025 оны 1-5 дугаар сард дор хаяж 40 000 хоол тэжээлийн дутагдлын тохиолдол бүртгэгджээ.
Цэнхэр Нил мужийн Аль-Карама 3 дүрвэгсдийн хуаранд хоол тэжээлийн дутагдлын тохиолдол 9 дүгээр сард 1800 байсан бол 11 дүгээр сард 2116 болж, хуарангийн хүүхдийн дөрөвний нэгээс илүүг хамарчээ. Тэдний 1760 нь таван хүртэлх настай.
Эль Ниньо үзэгдлийн улмаас Суданд борооны улиралд хур тунадас багасч, ган гачиг тус улсын тал орчим хувийг хамарсан байна. Хүнсний аюулгүй байдлын ангилал Их Дарфур, Их Кордофаны зарим хэсэгт өлсгөлөн болох эрсдэл нэмэгдэж байгааг анхааруулжээ.
Тосгоны олон гэр бүл гурил, сүүгээр голлон хооллодог бөгөөд өдөр тутмын хоолонд нь мах бараг ордоггүй.
