Тайландын амьтан хамгааллын сан өмнөх тэргүүнээ 13 сая орчим бат шамшигдуулсан гэж буруутгаж байна

Сангийн өмнөх тэргүүн мөнгө шамшигдуулсан гэж наймдугаар сарын 28-нд Цагдаагийн төв мөрдөн байцаах товчоонд гомдол гаргаж, нотлох баримт хүргүүлснээ Тайландын Watchdog Thailand амьтан хамгааллын сан Мягмар гарагт мэдэгджээ.

Сангийн тэргүүн, үүсгэн байгуулагч Бхурита Ватанасак Лхагва гарагт мэдээлэл өгөхдөө, мөрдөн байцаагчид олон арван гэрчээс мэдүүлэг авсан ч буруутгагдагчийг хараахан дуудаагүй гэжээ. Энэ тухай Bangkok Post сонин мэдээлэв.

Банкны хуулгыг хянахад өмнөх тэргүүн сангийн мөнгийг өөрийн болон тухайн үед сангийн нярав байсан охиныхоо хувийн дансанд шилжүүлсэн нь харагдсан гэж Бхурита буруутгаж байна. Амьтан эмчлэх болон бусад үйл ажиллагааны зардалд зөрүү байгааг анзаарсны дараа үүнийг илрүүлсэн гэж тэрбээр ярьжээ.

Гүйлгээ бага дүнгээс хэдэн зуун мянган бат хүртэл хэмжээтэй байсан бөгөөд зарим хандивыг сангийн хорооны мэдэлгүйгээр зарцуулсан гэнэ. Бхуритагийн хэлснээр, хохирлыг урьдчилсан байдлаар 13 сая орчим батаар тооцжээ.

Хохирлын улмаас сан мөнгөн урсгалын ноцтой хүндрэлд орж, золбин амьтдад үзүүлэх тусламжаа зарим талаар багасгахад хүрсэн гэж сангийн одоогийн нярав Супани Чанкхам-ай хэлжээ.

Сан хэлэлцээ хийж, мөнгө эсвэл бусад хөрөнгөө буцааж авахад бэлэн байгаа бөгөөд тэгэхгүй бол асуудлыг хуулийн дагуу үргэлжлүүлнэ гэж Бхурита хэлсэн байна. Буруутгагдагч цагдаад дуудагдах үедээ тайлбар өгөх боломжтой гэж тэрбээр нэмж хэлжээ.

Watchdog Thailand 2019 оны аравдугаар сарын 4-нд сангаар бүртгүүлсэн юм. Вэбсайтынх нь мэдээллээр, тус байгууллага улс дамнасан нохойн махны худалдаанаас 5000 гаруй нохой аварч, 2014 оноос хойш амьтныг хэрцгий харьцаанаас хамгаалах хуулийн дагуу хэд хэдэн хэрэг үүсгэжээ.