Тайвань Вильнюс дахь төлөөлөгчийн газрынхаа нэрийг өөрчлөх төлөвлөгөөгүй гэж мэдэгдэв

Тайвань Вильнюс дахь төлөөлөгчийн газрынхаа нэрийг өөрчлөх төлөвлөгөөгүй, нэр нь хоёр талын зөвшилцлөөр тогтсон гэж мэдэгдсэнийг Эр Эф Ай радио мэдээлжээ.

Литвийн Дельфи мэдээллийн сайтын мэдээлснээр Литва 9 дүгээр сард Тайванийн төлөөлөгчид албан бус баримт бичиг хүргүүлж, төлөөлөгчийн газрын одоогийн нэр хоёр талын эдийн засгийн харилцааг хөгжүүлэхэд саад болж байна гэж үзээд 10 дугаар сарын 1-ний дотор нэрээ өөрчлөхийг шаардсан аж. Энэ өдөр бол Хятадын үндэсний баяр юм.

Тайванийн Гадаад хэргийн яамны дэд сайд Чэнь Минци 10-ны өглөө нэрийг хоёр талын харилцааг гүнзгийрүүлэх зорилгоор тогтоосон, одоогоор өөрчлөх төлөвлөгөөгүй гэж мэдэгджээ.

Яамны хэвлэлийн төлөөлөгч Сяо Гуанвэй баримт бичиг болон таамаглалын талаар тайлбар хийхгүй гэж хэлээд, нэр нь ардчилал, эрх чөлөөний нийтлэг үнэт зүйлд суурилан хоёр засгийн газрын нягт зөвлөлдөөнөөр тогтсон гэдгийг дахин онцолсон байна.

Литвийн Ерөнхийлөгч Гитанас Науседа төлөөлөгчийн газрын нэрийг Тайвань шийдэх ёстой гэж олон нийтэд мэдэгдэж байсныг Сяо Гуанвэй сануулав. Науседа 10 дугаар сарын 27-нд Хятадтай харилцаагаа хэвийн болгох нь төлөөлөгчийн газрын нэртэй шууд холбогдох ёсгүй гэж хэлсэн юм.

Хоёр тал Украинд тусламж үзүүлэхэд хамтран ажиллаж ирсэн бөгөөд худалдаа, хөрөнгө оруулалт, технологи, боловсрол, соёлын салбарт бодит хамтын ажиллагаа өрнүүлж байгаа аж.