Ташкентад 500 киловольтын Кольцевая дэд станц ашиглалтад орж, цахилгаан хангамжийн найдвартай байдлыг сайжруулна

Ташкент мужид арваннэгдүгээр сарын 7-нд 500 киловольтын Кольцевая дэд станц ашиглалтад орж, нийслэл болон мужийн зарим хэсгийн цахилгаан хангамжийн найдвартай байдлыг дээшлүүлэхээр болсныг Газета.уз сайт мэдээлжээ.

Узбекистаны Эрчим хүчний яамны мэдээлснээр, Дэлхийн банкны оролцоотойгоор хэрэгжүүлсэн төслийн нийт өртөг 171.4 сая ам.доллар байна.

«1602 МВА хүчин чадалтай дэд станц бол Узбекистаны хамгийн том, орчин үеийн өндөр хүчдэлийн дэд бүтцийн байгууламжуудын нэг юм» гэж мэдэгдэлд дурджээ.

Төслийн хүрээнд 213 километр урт 220 киловольтын, 72 километр урт 500 киловольтын агаарын шугам барьж, нийт 285 километр шинэ өндөр хүчдэлийн шугам татсан байна.

Нийслэлийн бүсийн ачааллыг дахин хуваарилснаар Ташкентын дулааны цахилгаан станцын ачаалал буурч, түлшинд мазут хэрэглэхээ болих боломжтой болно.

Энэ нь Дэлхийн банкны санхүүжилтээр Узбекистаны Үндэсний цахилгаан сүлжээ компанийн хэрэгжүүлж буй нийт 380 сая долларын төслийн нэг хэсэг юм. 2021 онд батлагдсан төсөл 22 хуучирсан дэд станцыг шинэчлэхийг мөн хамарч байна.