Трампаас BBC-гийн эсрэг гаргасан гүтгэлгийн нэхэмжлэлийг шүүхээр хэлэлцүүлэхийг шүүгч зөвшөөрлөө

Дональд Трампаас BBC-гийн эсрэг гаргасан гүтгэлгийн нэхэмжлэлийг хэрэгсэхгүй болгох тухай тус телевизийн хүсэлтийг АНУ-ын шүүгч хангахаас татгалзаж, хэргийг шүүхээр хэлэлцүүлэхээр болжээ.

Euronews-ийн мэдээлснээр, нэхэмжлэл нь BBC-гийн Panorama баримтат нэвтрүүлэгт Трампын 2021 оны нэгдүгээр сарын 6-нд хэлсэн үгийг засварласан хэлбэрт үндэслэсэн юм. Нэвтрүүлэгт үгийн хоёр тусдаа хэсгийг залгасан тул Трамп дэмжигчдээ Вашингтон дахь Капитолын ордон руу дайрахыг ил тод уриалсан мэт харагдсан байна.

АНУ-ын тойргийн шүүгч Жеффри Т. Кунц Мягмар гарагт гүтгэлгийн нэхэмжлэлийг хэрэгсэхгүй болгохоос татгалзсан ч Флоридагийн Хууран мэхлэх, шударга бус худалдааны үйл ажиллагааны тухай хуулийн дагуу Трампын гаргасан хоёр дахь шаардлагыг хэрэгсэхгүй болгожээ. Нэвтрүүлэг арилжааны мэдээлэл биш гэж шүүгч үзсэн байна. Шаардлага тус бүрээр дор хаяж 5 тэрбум ам.доллар нэхэмжилсэн тул нэхэмжлэлийн дүн 10 тэрбум ам.доллараас дор хаяж 5 тэрбум ам.доллар болж буурлаа.

Залгасан хоёр хэсгийн хооронд цаг хугацааны зөрүү байгаа нь тухайн хэсэг үнэн мэдэгдэл байж чадахгүйг BBC мэдэж байсан, эсвэл мэдэх ёстой байсан гэж үндэслэлтэй дүгнэх боломж олгож байна гэж Кунц 40 хуудас бүхий шийдвэртээ бичжээ. “Энэ нь захын хэсгийг тайрсан хэрэг биш, харин илтгэлдээ хэлснээс өөр зүйлийг бүтээсэн хэрэг” гэж тэрбээр онцолсон байна.

“Бид энэ шийдвэрт гайхаж байгаа ч шүүхийн эрх мэдлийг хүндэтгэж байна” гэж BBC-гийн хэвлэлийн төлөөлөгч хэлэв. Харин Трамп Truth Social сүлжээндээ шийдвэрийг агуу ялалт хэмээн тодорхойлжээ.

BBC засварласандаа уучлалт гуйсан бөгөөд энэ явдлын улмаас Ерөнхий захирал Тим Дэви, мэдээний албаны дарга Дебора Тернесс нар огцорсон юм. Гэвч нэвтрүүлэг Трампад бодит хохирол учруулаагүй гэж BBC маргаж байна. Өнгөрсөн сард магистрат шүүгч Трампыг арванхоёрдугаар сарын 11 хүртэл мэдүүлэг өгөхийг тушаасан. Мэдүүлэг өгөхөөр ирэхгүй бол Трамп нэхэмжлэлээ хэрэгсэхгүй болгуулах зэрэг хариуцлага хүлээж болзошгүйг шүүх анхааруулжээ.