Германы Сингулус компани Илон Маскийн хиймэл дагуулд нарны зай нийлүүлэх 60 сая еврогийн гэрээ байгуулжээ

Илон Маск Лхагва гарагт Германы дунд хэмжээний Сингулус Текнолоджиз компанитай шинэ Стармайнд хиймэл дагуулдаа нарны зай нийлүүлэх томоохон гэрээ байгуулсныг Евроньюс мэдээлжээ. Маскийн мэдэгдсэнээр, 60 сая еврогийн энэ захиалга цаашдын олон захиалгын эхлэл болно.

Гэрээний дараа компанийн хувьцааны ханш түр зуур 65-80 хувиар өсөж, үнэлгээ нь 73 сая орчим еврод хүрчээ. Тус компанийн 2025 оны жилийн орлого ердөө 48.3 сая евро байжээ.

Стратегийн түншлэлийн хүрээнд 100 гигаватт хүчин чадалтай нарны эрчим хүчний үйлдвэрлэлд зориулж нэмэлт байгууламж, үйлдвэрлэлийн шугам байгуулахаар төлөвлөж байна. Энэ хүчин чадал нь арван том цөмийн реакторын жилийн үйлдвэрлэлтэй тэнцэнэ.

Германы баруун хэсэгт орших Каль-ам-Майн хотод төвтэй тус компани сансарт хэрэглэхэд онцгой тохиромжтой нарны зай үйлдвэрлэдэг аж.

Захиалгын дагуу 2027 оны эхээр Техас дахь Стармайнд хиймэл дагуулын үйлдвэрт нарны зай нийлүүлнэ. Стармайнд төсөл нь сансарт хиймэл оюун ухааны дата төвийн үүрэг гүйцэтгэх хиймэл дагуул үйлдвэрлэх зорилготой. Эдгээр хиймэл дагуул 75 метр урт нарны зайн далавчтай байх аж.

Маскийн энэ төслийн хүрээнд 1 сая хиймэл дагуул тойрог замд гаргана гэсэн мэдэгдэл биелэх магадлал бага ч хиймэл дагуулын операторууд зураг төслийн уян хатан байдлын үүднээс ихэвчлэн илүү тоогоор зөвшөөрөл хүсдэг. Одоогоор нийт 15 мянга орчим хиймэл дагуул байгаагийн 9500 нь Маскийн Старлинк сүлжээнийх юм.