Трампын засаг захиргаа цагаачдын цувааг зохион байгуулагчдад визийн хязгаарлалт тогтоожээ
Төрийн департамент хязгаарлалтад өртсөн хүмүүсийн нэр, иргэншлийг зарлаагүй байна.
Трампын засаг захиргаа Төв Америк, Мексикээр дамжин АНУ-ын өмнөд хил рүү чиглэж буй цагаачдын цувааг зохион байгуулсан, дэмжсэн, сурталчилсан хэмээн буруутгагдаж буй 15 гаруй хүнд визийн хязгаарлалт тогтоосон гэж Хиндустан Таймс сонин мэдээлжээ.
Төрийн департаментын хэвлэлийн төлөөлөгч Томми Пиготтын мэдэгдлээр яам сүүлийн долоо хоногт саяхны цагаачдын цуваатай холбоотой 15 гаруй хүнд визийн хязгаарлалт тогтоосон байна.
Энэ арга хэмжээ АНУ руу хууль бус цагаачлалыг санаатайгаар дэмжиж буй гэх гадаадын засгийн газрын албан тушаалтан болон бусад хүмүүст хамаарах юм. Хязгаарлалтын хүрээнд шинэ визийн хүсэлтээс татгалзах эсвэл одоо байгаа визийг хүчингүй болгож болох юм.
Аравдугаар сарын 29-ний мэдэгдэлд хязгаарлалтад өртсөн хүмүүсийн нэр, иргэншил, хэдэн визийг хүчингүй болгосныг дурдаагүй байна.
Төрийн департамент цуваанд оролцогчид АНУ-ын виз мэдүүлэх эсвэл тус улс руу зорчихыг оролдвол нэмэлт шалгалтад орно гэж анхааруулжээ.
АНУ-ын өмнөд хилийг зөвшөөрөлгүй давах нь Америкийн хуулийг зөрчсөн үйлдэл бөгөөд баривчлах, саатуулах, албадан гаргах үндэслэл болдог. Энэ мэдэгдэл хууль бус цагаачлалыг дэмжигчдийн эсрэг визийн хязгаарлалт ашиглах засаг захиргааны бодлогын үргэлжлэл юм.
