Узбекистаны Ерөнхийлөгч Төв Азийн орнуудыг уур амьсгалын асуудлаар нэгдэн ажиллахыг уриалжээ

Узбекистаны Ерөнхийлөгч Шавкат Мирзиёев Туркийн Анталья хотод болж буй НҮБ-ын Уур амьсгалын өөрчлөлтийн суурь конвенцын Талуудын бага хурлын 31 дэх чуулганд Төв Азид уур амьсгалын интеграцийн загвар хөгжүүлэх санаачилгыг 11 дүгээр сарын 11-нд дэвшүүлснийг Газета.уз сайт мэдээлжээ.

“Ямар ч улс уур амьсгалын асуудлыг ганцаараа шийдэж чадахгүй. Төв Азид мөсөн гол хайлах, усны хомсдол, хэт ган гачиг зэрэг аюулын цар хүрээ нэмэгдэж байна” гэж тэрбээр онцолжээ.

Мирзиёев энэ санаачилгын хүрээнд мэдээлэл, технологи, санхүүгийн гурван гол чиглэлээр хамтын ажиллагааг эхлүүлэхийг санал болгожээ. Тэрбээр Дэлхийн цаг уурын байгууллагын дэмжлэгтэйгээр уур амьсгалын эрсдэлийн мэдээлэл солилцох дэд бүтэц бий болгож, эхний шатанд байгалийн гамшгаас урьдчилан сэрэмжлүүлэх систем байгуулах шаардлагатай гэжээ.

Ерөнхийлөгч хөгжлийн банкууд болон зориулалтын сангуудтай хамтран хөнгөлөлттэй буцалтгүй тусламж зэрэг дэмжлэгийн шинэ хэрэгслийг боловсруулахыг санал болгож, ийм загварыг сонирхсон дэлхийн бүх бүс нутагт нэвтрүүлэхийг уриалжээ.

Мирзиёевын хэлснээр, Узбекистан нэгж ДНБ-д ногдох хүлэмжийн хийн ялгарлыг 35 хувиар бууруулах зорилтоо хугацаанаас өмнө биелүүлж, 2035 он гэхэд 50 хувиар бууруулах шинэ зорилт тавьжээ. Дөрвөн жилийн дараа тус улсын эрчим хүчний үйлдвэрлэлд сэргээгдэх эх үүсвэр 54 хувийг эзэлнэ.

Сүүлийн 10 жилд нэгж бүтээгдэхүүнд ногдох усны хэрэглээ бараг хоёр дахин, ус татан авалт тавны нэгээр буурч, ус хэмнэх технологи усалгаатай газрын 60 гаруй хувийг хамарсан гэж Ерөнхийлөгч хэлжээ. Мөн тус улс ойн талбайгаа 6 сая га-гаар нэмэгдүүлсэн бөгөөд үүний гуравны нэгийг Аралын тэнгисийн орчимд тарьжээ.

Узбекистан ирэх оноос Аралын тэнгисийг аврах олон улсын санг даргална. Бага хуралд 90 гаруй орны төр, засгийн тэргүүнүүд оролцож байна.