Япон Оросоос эрчим хүчний хамаарлаа бууруулах ч Сахалины төслүүдээс гарахгүй

Интерфакс агентлагийн мэдээлснээр, Японы засгийн газар нүүрс, газрын тос зэрэг Оросын эрчим хүчний эх үүсвэрээс хамаарах байдлаа аажмаар бууруулахаар төлөвлөж байгаа тухай тус улсын Гадаад хэргийн яамны гадаад бодлого, үйл ажиллагааны жилийн тайланд дурджээ. Гэвч Орос дахь Сахалин-1, Сахалин-2 газрын тос, байгалийн хийн ордын төслүүд нь дунд болон урт хугацаанд тогтвортой нийлүүлэлт хангах үүднээс Японы эрчим хүчний аюулгүй байдалд чухал ач холбогдолтой тул засгийн газар эдгээр төсөл дэх ашиг сонирхлоо хадгалах бодолтой байна гэж тайланд онцолжээ.

Сахалин-1 төсөлд хойгийн зүүн хойд тавиурын Чайво, Одопту, Аркутун-Даги гэсэн газрын тос, байгалийн хийн гурван орд багтдаг. Нийт нөөцийг 307 сая тонн газрын тос, 485 тэрбум шоо метр байгалийн хий гэж тооцдог. Консорциум 2019 онд жилд 12.96 сая тонн газрын тос олборлож оргилдоо хүрсний дараа олборлолт буурч эхэлсэн. 2020 онд 12.44 сая тонн, 2021 онд 11.3 сая тонн олборлосон бөгөөд 2022-2025 оны олборлолтын нарийн тоо мэдээллийг нийтлээгүй байна.

Оросын Ерөнхийлөгч эрх мэдлийг Эксон Нефтегаз компаниас шилжүүлэх тухай зарлигт гарын үсэг зурснаар 2022 оны 10 дугаар сараас Сахалин-1 хязгаарлагдмал хариуцлагатай компани төслийн оператор болсон. Уг компанийг Роснефтийн охин компани удирддаг бөгөөд тэрээр бүтээгдэхүүн хуваах гэрээн дэх хувьдаа тохируулан шинэ операторын 11.5 хувийг, өөр нэг охин компани 8.5 хувийг эзэмшдэг.

Японы СОДЕКО компани 30 хувь, Энэтхэгийн төрийн газрын тос, байгалийн хийн корпораци 20 хувийн хувьцаагаа шинэ операторт хадгалахыг зөвшөөрсөн бол 30 хувь эзэмшиж байсан Эксон Мобил компани төслөөс гарч, Оросоос бүрэн гарахаа мэдэгджээ.

Сахалин-2 төслийн хүрээнд Сахалины далайн тавиурын Пильтун-Астохское, Лунское ордуудыг ашиглаж байна. Сахалины өмнөд хэсгийн Пригородное дахь шингэрүүлсэн байгалийн хийн үйлдвэр 2009 оны 2 дугаар сард ашиглалтад орж, 2010 онд жилд 9.6 сая тонн гэсэн зураг төслийн бүрэн хүчин чадалдаа хүрсэн. Дараа нь үйл ажиллагаагаа оновчтой болгосноор бүтээмжээ нэмэгдүүлж, 2025 онд 10.3 сая тонн шингэрүүлсэн хий үйлдвэрлэжээ. Төслийн оператор нь Газпром, Японы Мицүй, Мицубиши компаниудын хамтран эзэмшдэг Сахалинская энергия компани юм.