Японы анимэгийн зах зээл анх удаа 4 их наяд иенээс давжээ

Японы анимэгийн зах зээл 2025 онд 4.45 их наяд иен буюу 28 тэрбум ам.долларт хүрч, гадаад дахь борлуулалт хүчтэй байсны ачаар анх удаа 4 их наяд иенээс давсныг Японы анимэгийн холбоо баасан гарагт мэдэгджээ. Энэ тухай Киодо агентлаг мэдээлэв.

Холбооны урьдчилсан мэдээллээр, зах зээл 2015 оны 1.8 их наяд иенээс хоёр дахин илүү өссөн бөгөөд гадаад дахь борлуулалт 2.54 их наяд иенд хүрчээ.

Японы анимэгийн гадаад дахь борлуулалт 2020 онд анх удаа дотоодын борлуулалтаас давж байсан юм.

Тахлын дараах өсөлтийн үед Нетфликс зэрэг стриминг үйлчилгээ хурдан тэлж, Японы анимэг дотоод болон гадаадын үзэгчдэд илүү хүртээмжтэй болгосон нь өсөлтийн гол хөдөлгөгч хүч болсон бололтой.

Алдарт мангагаас сэдэвлэсэн Чөтгөр алагч цувралын Хязгааргүй цайз кино 2025 онд салбарын өсөлтөд хувь нэмэр оруулсан бүтээлүүдийн нэг байв.

“Японы анимэг дэлхий даяар илүү танил болсноор зах зээл, боломж нь цаашид тэлж байна” гэж холбооны ерөнхийлөгч Казуко Ишикава Токиод болсон арга хэмжээн дээр хэлжээ.

Японы засгийн газар тоглоом, анимэг, манга зэрэг контентын гадаад дахь борлуулалтыг 2023 оны 5.8 их наяд орчим иенээс 2033 он гэхэд 20 их наяд иенд хүргэхээр зорьж байна. 2023 онд энэ борлуулалт зөвхөн автомашины салбарын дараа орж байжээ.