ЕХ Европын Төв банкны шинэ ерөнхийлөгчийг оны эцэс гэхэд сонгохоор зорьж байна

Европын холбоо Европын Төв банкны дараагийн ерөнхийлөгчийг оны эцэс гэхэд томилохыг хүсч байгааг Евро бүлгийн дарга Кириакос Пьерракакис даваа гарагт мэдэгдсэнийг Дойче Велле радио мэдээлжээ.

Төв банкийг долоон жил удирдсан Кристин Лагард бүрэн эрхийн хугацаа дуусахаас есөн сарын өмнө огцрохоо 10 дугаар сарын 29-нд зарласан юм.

«Бүх үйл явцыг оны эцэс гэхэд дуусгах зорилготой байна» гэж Пьерракакис евро бүсийн сангийн сайд нарын уулзалтын өмнө хэлсэн байна.

Лагардыг орлох нэр дэвшигчид нь Нидерландын Төв банкны экс ерөнхийлөгч Клаас Кнот болон Олон улсын төлбөр тооцооны банкны тэргүүн, Испанийн Пабло Эрнандес де Кос юм.

Испанийн Эдийн засгийн сайд Карлос Куэрпо Эрнандес де Косыг тохирох хүн гэж үзэж байгаа бол Нидерландын Сангийн сайд Ээлко Хейнен Кнотыг маш сайн нэр дэвшигч гэжээ. Хейнен уг өрсөлдөөнийг Европын хойд, өмнөд хэсгийн тэмцэл гэж харж болохгүй гэдгийг онцолсон байна.

Томилгооны журмаар евро бүсийн сангийн сайд нар нэр дэвшигч дэвшүүлж, Европын парламент сонсгол хийсний дараа ЕХ-ны удирдагчид эцсийн шийдвэр гаргадаг.

Үүнээс гадна зах зээлийн үйл ажиллагаа хариуцсан Изабель Шнабель 2027 оны 1 дүгээр сарын 3-нд, ерөнхий эдийн засагч Филип Лейний бүрэн эрх 2027 оны 5 дугаар сард дуусах тул эдгээр суудлыг ч нөхөх ёстой.