Ерөнхийлөгч Ли Жэ Мён эрх баригч намын удирдлагатай оройн зоог барьж, эв нэгдэлтэй байхыг уриаллаа

Өмнөд Солонгосын Ерөнхийлөгч Ли Жэ Мён эрх баригч Ардчилсан намын дарга Ким Мин Сок, парламент дахь бүлгийн дарга Хан Бён До нартай Лхагва гарагт оройн зоог барьж, засгийн газар, нам эв нэгдэлтэй байхыг уриалсныг тамгын газар нь мэдэгджээ.

The Korea Times сонины мэдээлснээр, Цэнхэр ордонд болсон зоогийн үеэр Ким туйлшралыг даван туулах, хэрэглээг нэмэгдүүлэх зоримог, шуурхай арга хэмжээ авахыг засгийн газраас хүссэн байна. Энэ тухай ерөнхийлөгчийн хэвлэлийн төлөөлөгч Кан Ю Жон бичгээр гаргасан мэдэгдэлдээ дурджээ.

Хариуд нь Ли ард иргэдийн амьдралыг сайжруулахын тулд нам, засгийн газар “нэг бие мэт хөдлөх” шаардлагатай гэдгийг онцолж, засгийн газрын 2027 оны төсвийн төслийг батлахад нам болон Үндэсний ассамблей идэвхтэй дэмжлэг үзүүлэхийг хүсэв.

Ли мөн тамгын газрын дарга Лим Кван Хён, улс төрийн асуудал эрхэлсэн ахлах нарийн бичгийн дарга Чой Ин Хо нарт Үндэсний ассамблейтай үргэлж нягт харилцаатай байхыг даалгажээ. Тэд хоёулаа зоогт оролцсон байна.

Үл хөдлөх хөрөнгийн татвар, зохиомол ял тулгасан гэх хэргүүдийг шалгах тусгай прокурорын тухай хуулийн төсөл зэрэг маргаантай асуудлыг Ли болон намын удирдагчид хэлэлцэж магадгүй гэсэн таамаглал байсан. Гэвч аль нь ч хөндөгдөөгүй гэж ерөнхийлөгчийн тамгын газрын нэгэн албан тушаалтан хэлжээ.