Европ квантын технологийн уралдаанд хиймэл оюуны алдаанаасаа суралцахаар зэхэж байна

Европын холбоо квант тооцооллын салбарт АНУ, Хятадаас түрүүлж явахын тулд гишүүн орнуудаа нэгтгэхийг зорьсон Квантын тухай хуулийн төслөө танилцуулахаар бэлтгэж байгааг Политико мэдээлжээ.

Арваннэгдүгээр сард өргөн барих саналын төслийг тус хэвлэл олж авчээ. Судалгааг өрсөлдөх чадвартай бүтээгдэхүүн болгож, дэлхийд тэлэхэд шаардлагатай санхүүжилт дутагдсан зэрэг хиймэл оюуны салбарт Европыг хязгаарласан хүчин зүйлийг даван туулах нь төслийн зорилго юм.

Квант компьютер өнөөгийн компьютерээс хамаагүй хүнд асуудал шийдэх чадвартай тул эм боловсруулалтаас цэргийн салбар хүртэл олон салбарт хувьсгал хийж болзошгүй гэж үздэг. Орчин үеийн харилцаа холбоо, банкны үйлчилгээг хамгаалдаг шифрлэлтийг эвдэж чадах тул үндэсний аюулгүй байдалд ч чухал ач холбогдолтой.

Төсөлд салбарыг дэмжихэд голлон анхаарч, засгийн газруудыг квант технологийг ЕХ-ны компаниудаас эсвэл энэ чиглэлээр стратегийн түншлэлтэй орнуудаас худалдан авахыг үүрэгжүүлжээ.

«Энэ нь зохицуулалтын тухай биш. Зохицуулах зүйл алга» гэж Европын комиссын өндөр албан тушаалтан Политикод хэлжээ.

Францын Элис энд Боб компанийн гүйцэтгэх захирал Тео Перонен квантыг хиймэл оюун шиг шийдэл биш, харин дэд бүтэц, тооцооллын хүчин чадал гэж тайлбарлажээ.

Европ квантын патентаар тэргүүлэгчдийн нэг боловч дэлхийн хувийн санхүүжилтийн дөнгөж 5 хувийг татдаг гэж өнгөрсөн жилийн Квантын Европ стратегид дурджээ.

Судалгаанаас зах зээл хүртэлх зөрүү, санхүүжилтийн дутагдлыг даван туулах гарц нь хамтрал гэдгийг Европын комисс гишүүн орнуудад хэлэх гэж байна. Хүчин чармайлтаа уялдуулах тусгай санаачилгыг мөн төсөлд санал болгожээ.