Европын комисс ТикТокийг хэрэглэгчдийн сэтгэцийн эрүүл мэндийг хамгаалж чадаагүй гэж буруутгажээ

Европын комисс Баасан гарагт гаргасан урьдчилсан дүгнэлтдээ ТикТок платформ хэрэглэгчдийг нэг сэдвийн агуулгын тасралтгүй урсгалд оруулж, хоолны дуршлын эмгэг, түгшүүрийг дордуулах эрсдэл учруулж, тэдний сэтгэцийн эрүүл мэндийг хамгаалж чадаагүй гэж буруутгасныг Гардиан сонин мэдээлжээ.

ЕХ-нд 189 сая хэрэглэгчтэй Хятадын эзэмшлийн богино видеоны платформ биеийн төрх, ганцаардал зэрэг сэдвийн давтагдсан агуулгыг хэрэглэгчдэд санал болгохоос сэргийлээгүй гэж комисс үзжээ.

«ТикТок хэрэглэгчдийн, тэр дундаа насанд хүрээгүй хүмүүсийн сайн сайхны төлөө хүчин чармайлтаа нэмэгдүүлэх ёстой» гэж Европын комиссын технологийн бодлого хариуцсан Хенна Вирккунен хэлжээ.

Комиссын үзэж байгаагаар хэрэглэгч хоолны дэглэмийн тухай видеог сонирхохгүй гэж тэмдэглэсэн ч алгоритм ижил төстэй агуулгыг санал болгосоор байжээ. ЕХ-ны албаныхан ТикТокийг агуулга санал болгох урсгалаа өөрчилж, хэрэглэгчдэд илүү хяналт олгохыг хүсэж байна.

Энэ дүгнэлт Дижитал үйлчилгээний тухай хуулийн дагуу 2024 оны 2 дугаар сард эхлүүлсэн өргөн хүрээний мөрдөн шалгалтын нэг хэсэг юм. ТикТок мөрдөн шалгалтын материалтай танилцаж өөрийгөө өмгөөлөх эрхтэй бөгөөд санал болгох системээ өөрчилснөөр торгуулиас зайлсхийх боломжтой.