Зеленский Абу-Даби дахь хэлэлцээний өмнө Берлинд ирж, Мерцтэй уулзав

Украины Ерөнхийлөгч Зеленский Оростой хийх шинэ шатны хэлэлцээний өмнө Берлинд айлчилж, Канцлер Мерцтэй уулзжээ гэж Дойче Велле радио мэдээлэв.

Энх тайван нэр төртэй байж гэмээнэ удаан үргэлжилнэ гэж Зеленский онцолсон байна. Аюулгүй байдлын бүх сорилт дээр Европын улсууд нэг байр суурьтай болоход хүчин чармайлт гаргана гэж тэрбээр хэлжээ.

Аюулгүй байдлын үүднээс зарлаагүй энэ айлчлалын үеэр Зеленский Мерцтэй агаарын хамгаалалт, эрчим хүчний системийг сэргээх асуудлыг ярихаа өмнө нь бичсэн байв.

АНУ-ын Ерөнхийлөгчийн тусгай элч Стив Уиткоффын мэдэгдсэнээр, гурван талын яриа 11 дүгээр сарын 10-11-нд Абу-Дабид болж, төрийн тэргүүнүүдийн зөвлөх түвшний төлөөлөгчид оролцох юм. Дайны дараах аюулгүй байдал, хурцадлыг бууруулах, хүмүүнлэгийн тусламжийн асуудлыг хэлэлцэхээр болжээ.

АНУ-ын элч нар энэ долоо хоногт Брюссельд Герман, Франц, Их Британи, НАТО, ЕХ-ны төлөөлөгчидтэй уулзах аж. Европын төлөөлөгчид ширээний ард суухгүй байсан ч ямар нэг хэлбэрээр Абу-Дабид оролцоно гэж Германы тал хүлээж байна.

Дараагийн долоо хоногуудад хэд хэдэн дээд хэмжээний уулзалт болох юм. 11 дүгээр сарын 18-19-нд Шэньжэнь хотод болох АПЕК-ийн үеэр АНУ, Хятад, Оросын удирдагчид гурван талт уулзалт хийж магадгүй юм. 35 орчим улсын Сайн дурынхны эвсэл Берлинд уулзахаар төлөвлөж байна.

Цэргийн талаас Украинд Оросын баллистик пуужинг саатуулах агаарын хамгаалалтын пуужин, ялангуяа Америкийн Патриот систем хэрэгтэй байна. Германы зэвсэгт хүчин өөрийн хамгаалалтад хохирол учруулахгүйгээр өгч чадах бүх системээ аль хэдийн шилжүүлсэн юм.

Зеленский ирэх жил Европоос нэмж 70 тэрбум евро хэрэгтэй гэж 10 дугаар сарын ЕХ-ны дээд хэмжээний уулзалтад мэдэгдсэн. Энэ мөнгийг хэрхэн бүрдүүлэх нь оны үлдсэн гурван уулзалтын сэдвүүдийн нэг болно.