Англид Оросын төлөө тагнуул хийсэн гэх АНУ-ын цэрэг баривчлагджээ

Их Британийн терроризмын эсрэг цагдаа АНУ-ын цэргийн болон хууль сахиулах байгууллагуудтай хамтран ажиллаж, Оросын төлөө тагнуул хийсэн гэх сэжгээр 41 настай Америк цэргийг Глостерийн ойролцоо баривчилжээ. Энэ тухай Евроньюс мэдээлэв.

Цэргийн алба хаагчийг Мягмар гарагт үндэсний аюулгүй байдлын хуулийн дагуу саатуулж, Лондон дахь цагдаагийн хэлтэст хүргэсэн бөгөөд тэрбээр цагдан хоригдсон хэвээр байна гэж Лондонгийн цагдаа мэдэгджээ. Энэ хэрэг терроризмын эсрэг бусад мөрдөн шалгалттай холбоогүй аж.

“Энэ чухал баривчилгаа, мөрдөн шалгалт Их Британи, АНУ-ын эрх баригчдын нягт хамтын ажиллагааны үр дүн юм” гэж терроризмын эсрэг цагдаагийн ахлах үндэсний зохицуулагч Вики Эванс хэлжээ.

Холбооны мөрдөх товчооны захирал Каш Пател Британийн цагдаа, тагнуулын албанд талархал илэрхийлжээ. АНУ-ын армийн Сөрөг тагнуулын командлалын командлагч генерал Шон Стинчон нууц мэдээлэлд хандах эрхтэй ахлах цэргийн үйлдэл дотоод аюул бодит, байнгын гэдгийг сануулж байна гэж үзсэн байна.

Пентагон асуултуудыг АНУ-ын армид шилжүүлсэн бөгөөд арми одоогоор тайлбар өгөөгүй байна.

Энэ баривчилгаа Москватай холбоотой Их Британид гарсан тагнуулын хэргүүдийн хамгийн сүүлийнх нь юм. 9 дүгээр сард Британийн нэгэн эр Оросын цэргийн тагнуулын даалгавраар дрон үйлдвэрлэх байгууламжуудыг хорлон сүйтгэхээр бэлтгэж байсан гэж буруутгагдан Лондонгийн шүүхэд оржээ. 2006 онд Оросын тагнуулч асан Александр Литвиненког Лондонд хордуулж, 2018 онд Солсбери хотод давхар агент Сергей Скрипалыг хордуулахыг завдсан юм.