АНУ-ын тангарагтны шүүх Руандагийн геноцид дахь үүргийнхээ талаар худал мэдүүлсэн эрийг гэм буруутайд тооцжээ
Эрик Ншимийе геноцидод оролцсон хуучин найзынхаа шүүх хуралд худал мэдүүлэг өгсөн гэж прокурорууд үзжээ.
АНУ-ын Массачусетс мужийн Бостон хотын холбооны тангарагтны шүүх 1994 оны Руандагийн геноцид дахь үүргийнхээ талаар худал хэлсэн Руанда гаралтай америк эрийг худал мэдүүлэг өгсөн, шударга ёсонд саад учруулсан хэргээр гэм буруутайд тооцжээ. Энэ тухай Аль Жазира мэдээлэв.
Дөрвөн хүүхдийн эцэг, 55 настай Эрик Ншимийе 2019 онд Бостонд болсон шүүх хуралд анагаахын сургуулийн өрөөний хамтрагч асан Жан Леонар Теганьягийн талд мэдүүлэг өгөхдөө худал хэлсэн гэж буруутгагдаж байв. Теганья хожим геноцидод оролцсон хэргээр ял авсан бол Ншимийе тэр үед Бутаре хотод тутси үндэстнийг хөнөөж, хүчирхийлсэн хэрэгт өөрөө ч, найз нь ч оролцоогүй гэж мэдүүлжээ.
АНУ-ын Дотоодын аюулгүй байдлын яамны мөрдөгчид Ншимийег 2024 онд Охайо дахь гэрээс нь баривчилсан юм. Тангарагтны шүүх мягмар гарагт түүнийг худал мэдүүлэг өгсөн дөрвөн зүйл анги, шударга ёсонд саад учруулсан нэг зүйл ангиар гэм буруутайд тооцсон байна.
«Энэ шүүгдэгч бараг гуч жилийн турш 1994 оны Руандагийн геноцидод оролцсон, тэр дундаа хүмүүсийг цохиж алсан зэрэг аймшигт хүчирхийллээ нуусаар ирсэн» гэж Хууль зүйн яамны Эрүүгийн хэлтсийн туслах Ерөнхий прокурор Тайсен Дюва мэдэгдэлдээ дурджээ.
Шийдвэр гарсны дараа Ншимийегийн өмгөөлөгчид түүний урьдчилан хоригдсон хоёр жил хагасын хугацаа ийм хэрэгт ногдуулдаг ердийн ялаас урт тул түүнийг суллах ёстой гэж шүүхэд хүсэлт гаргажээ.
Гэрчүүд Ншимийе 1994 онд Бутаре хотод цөөнх тутси үндэстний эсрэг аллага, хүчирхийлэлд оролцсоныг санаж байгаагаа мэдүүлсэн байна. Хэт даврагч хуту үндэстнүүдийн үйлдсэн геноцидын улмаас 100 орчим хоногийн дотор 800 мянга гаруй хүн амь үрэгдсэн юм.
Өмгөөлөгчид Ншимийе геноцидын дараах дотоодын болон олон улсын шүүхүүдэд хэзээ ч холбогдож байгаагүйг онцолж, засгийн газрын гэрчүүдийн мэдүүлэгт зөрчилтэй зүйл байгааг дурдсан байна.
Энэ хэрэг АНУ-д явагдаж буй Руандагийн геноцидтой холбоотой хэд хэдэн хэргийн нэг юм. Прокурорууд 2025 оны дөрөвдүгээр сард Нью-Йоркийн 65 настай зөгийчин Фостен Нсабумукунзийг, мөн оны зургадугаар сард Охайогийн 65 настай Венсан Нзигийимфураг геноцид дахь үүргээ нуусан хэргээр буруутгажээ.
