АНУ-ын Тэнгисийн цэргийн хүчний командлагч Өмнөд Солонгостой сургалтын салбарт хамтран ажиллахын ач холбогдлыг онцлов

АНУ-ын Тэнгисийн цэргийн хүчний ахлах командлагч Өмнөд Солонгостой боловсрол, сургалтын хамтын ажиллагааны ач холбогдлыг онцолж, хоёр орны далайчдын хоорондын нөхөрлөлийг холбоотны харилцаанд оруулж буй урт хугацааны хөрөнгө оруулалт хэмээн тодорхойлсныг Корея Таймс сонин Ёнхап агентлагийг иш татан мэдээлжээ.

АНУ-ын Тэнгисийн цэргийн боловсрол, сургалтын командлалын командлагч, контр-адмирал Грег Хаффман 10 дугаар сарын 27-нд Флоридагийн Пенсакола дахь тэнгисийн цэргийн агаарын баазад Өмнөд Солонгосын Хансандо сургалтын хөлөг дээр болсон хүлээн авалтын үеэр ийн хэлжээ. Энэ тухай АНУ-ын цэргийнхний Даваа гарагт нийтэлсэн тайланд дурджээ.

“Энэ аяллын үеэр бий болсон нөхөрлөл бол манай холбоотны харилцаанд хийж болох хамгийн удаан хугацааны, харилцан ашигтай хөрөнгө оруулалтын нэг юм” гэж Хаффман хэлжээ.

Айлчлалын үеэр Хаффман Солонгосын Тэнгисийн цэргийн академийн дарга, дэд адмирал Пак Гю Бэк, Солонгосын Тэнгисийн цэргийн хүчний аяллын сургалтын хэсгийн командлагч, контр-адмирал Ким Жун Ёп зэрэг ахлах офицеруудтай уулзжээ.

Энэ айлчлал хоёр орны тэнгисийн цэргийн боловсрол, сургалтын командлалуудын хооронд хийсээр ирсэн харилцан айлчлалын үргэлжлэл болжээ. Үүнд Өмнөд Солонгосын дэд адмирал Кан Жон Хо 2025 оны 9 дүгээр сард Пенсаколад, Хаффман энэ оны 9 дүгээр сард Өмнөд Солонгосын Жинхэд айлчилсан нь багтана.

Хансандо хөлгийн солонгос далайчид мөн Пенсакола дахь Ахмад дайчдын дурсгалын цэцэрлэгт хүрээлэнд очиж, Солонгосын дайнд оролцогсдыг хүндэтгэн Солонгосын дайны дурсгалын хөшөөнд цэцэг өргөжээ.