Өмнөд Солонгос гадаадаас 3 сарын хэрэгцээний таргалалтын эм авчрахыг зөвшөөрлөө

Гадаадад хууль ёсоор худалдан авсан таргалалтын эмийг энэ долоо хоногоос эхлэн 3 сарын хэрэгцээ хүртэл хэмжээгээр Өмнөд Солонгост авчрахыг зөвшөөрснөө Хүнс, эмийн аюулгүй байдлын яам Лхагва гарагт мэдэгджээ. Энэ тухай Ёнхап агентлаг мэдээлэв.

Яамны Солонгосын гаалийн албатай байгуулсан тохиролцооны дагуу, Пүрэв гарагаас эхлэн Вегови, Мунжаро зэрэг өөрийн хэрэгцээнд авсан эмийг гар тээшиндээ авч явах боломжтой болно. Гар тээшинд 6 хүртэл сав эм, эсвэл 6-аас давсан ч 3 сарын хэрэгцээ хүртэл хэмжээг авч явж болох юм.

Гадаадаас шууд захиалж авахад энэ журам хамаарахгүй.

Өмнө нь Вегови, Мунжаро эмийг зорчигчдын гар тээшээр оруулахыг хориглож байсан ч үнийн зөрүүгээс болж хөрш орнуудаас эдгээр эмийг худалдан авахыг оролдох солонгосчуудын тоо нэмэгдэж байгаа юм.