Инчонд 10 хүнийг хутгалж хөнөөхийг завдсан гэх эрийг яллажээ

Өмнөд Солонгосын прокурорууд өнгөрсөн сард Инчон хотын худалдааны төвд 10 хүнийг хутгаар хөнөөхийг завдсан хэргээр нэгэн эрийг яллаж байгаагаа Лхагва гарагт мэдэгджээ. Энэ тухай Корея Таймс сонин мэдээлэв.

Прокурорын мэдээлснээр, 59 настай Чой Чун Рак 10 дугаар сарын 13-нд Сөүлийн баруун талд орших Инчон хотын худалдааны төвд хохирогчдыг хутгалж, 7 хүнийг шархдуулсан хэргээр хүн алахыг завдсан, зэвсэг хадгалсан хэрэгт буруутгагдаж байна.

Чой хоёр гартаа хутга наалдуулан зэвсэглэсэн байсан бөгөөд цагдаа нар түүнийг баривчилжээ. Цагдаагийн байцаалтын үеэр тэрбээр орон нутгийн эмнэлэгт авсан эмчилгээндээ уурласандаа халдлага үйлдсэн гэж мэдүүлсэн байна.

Чой хүн алахыг завдсан 2 хэрэг зэрэг 10 удаа ял шийтгүүлж байсан бөгөөд хэрэг үйлдэх үедээ шагайн электрон бугуйвч зүүсэн байжээ.