Өмнөд Солонгос гадаадад үрчлэгдсэн иргэдийнхээ эрхийг хамгаалах арга хэмжээг хэлэлцжээ

Өмнөд Солонгосын Ерөнхийлөгчийн тамгын газар гадаадад үрчлэгдсэн солонгосчуудын эрхийг хамгаалах, тэдний гомдлыг шийдвэрлэх арга хэмжээг хэлэлцэх уулзалтыг Лхагва гарагт хийжээ. Энэ тухай Корея Таймс сонин мэдээлэв.

Үндэсний аюулгүй байдлын хоёрдугаар дэд зөвлөх Лим Ун Сун гадаад дахь солонгосчуудын асуудал хариуцсан ажлын хэсгийн хуралдааныг даргалж, Үнэн, эвлэрлийн комиссын зөвлөмжийн хэрэгжилтийг хянасан байна.

Дэлхийн өнцөг булан бүрээс хэдэн зуун үрчлэгдэгсэд гомдол гаргасны дараа тус комисс өнгөрсөн оны 3 дугаар сард тэдний хэдэн арвыг үрчлэлтийн явцад хүний эрх нь зөрчигдсөн хохирогч гэж албан ёсоор хүлээн зөвшөөрсөн юм.

Комиссын дүгнэлтээр, үрчлэгдэгсдийг өнчин гэж хуурамчаар бичиг баримт үйлдэх, үрчлэн авах эцэг эхийн шаардлагыг зохих ёсоор үнэлээгүй зэрэг зөрчил гарчээ. Комисс төрөөс албан ёсоор уучлалт гуйх, хохирлыг барагдуулах, үрчлэлтийн мэдээллийн тогтолцоог сайжруулахыг зөвлөсөн байна.

Лхагва гарагийн уулзалтаар үрчлэлтийн баримт бичгийг удирдах, үрчлэгдэгсдийн Солонгосын иргэншлийг сэргээх, төрсөн гэр бүлээ олох, Солонгост суурьшихад нь туслах үйлчилгээг хэлэлцжээ. Ерөнхийлөгчийн тамгын газрын мэдээлснээр, гадаадад үрчлэгдсэн солонгосчуудын тоо 168,000 орчим байна.

Ерөнхийлөгч Ли Жэ Мён өнгөрсөн оны 10 дугаар сард Фэйсбүүк хуудсандаа гадаадад үрчлэгдэгсдийн өмнө нь амссан зовлонгийн төлөө уучлалт гуйж, тэдний эрхийг хамгаалах хүчин чармайлтаа бэхжүүлэхээ амлаж байсан юм.