АНУ-ын зуучлалтай Украины энхийн хэлэлцээ ирэх долоо хоногт Абу-Дабид сэргэнэ гэж Уиткофф мэдэгдэв

АНУ ирэх долоо хоногт Украин, Оросын төлөөлөгчдийг Абу-Дабид цуглуулж, дайныг дуусгах асуудлыг хэлэлцүүлнэ гэж Цагаан ордны тусгай элч Стив Уиткофф Даваа гарагт мэдэгджээ. Энэ тухай Москоу Таймс сонин мэдээлэв.

Хэлэлцээ 11 дүгээр сарын 10, 11-нд ажлын түвшинд болж, дайны дараах аюулгүй байдал, хурцадлыг намжаах, хүмүүнлэгийн асуудал, энх тайвны дараагийн алхмыг хэлэлцэх юм.

Америкийн хэлэлцээчид мөн энэ долоо хоногт Брюссельд Франц, Герман, Их Британи, ЕХ, НАТО-гийн төлөөлөгчидтэй уулзаж, Украины аюулгүй байдлын баталгааг хэлэлцэхээр төлөвлөжээ.

«Бид Киев, Осло, Санкт-Петербургт гаргасан ахицад тулгуурлан хойч үедээ удаан хугацааны аюулгүй байдлыг хангах цогц, тогтвортой энхийн хэлэлцээрт хүрэхийг тэсэн ядан хүлээж байна» гэж Уиткофф бичсэн байна.

АНУ-ын ахлах албан тушаалтны хэлснээр, Абу-Дабид Уиткофф, Трампын хүргэн Жаред Кушнер АНУ-ыг төлөөлөх төлөвтэй байна. Кремль дараагийн шатны хугацааг хараахан баталгаажуулаагүй аж.

Уиткофф өнгөрсөн сард Санкт-Петербургт Владимир Путинтэй уулзсаны дараа Оросын албаныхан 11 дүгээр сард Абу-Дабид гурван талын шинэ хэлэлцээ болно гэж мэдэгдсэн юм.

АНУ-ын Ерөнхийлөгч Дональд Трамп энхийн хэлэлцээрт зуучилж чадаагүй байгаа бөгөөд сүүлийн долоо хоногт Зеленскийг улам хатуу шүүмжилж байна.

Зеленский энх тайвны төлөө газар нутгаа өгөхийг эсэргүүцэж, энэ нь Оросын түрэмгийллийг улам дэмжинэ гэж үзэж байна. Харин Путин гал зогсоох урьдчилсан нөхцөл болгон Донецк мужийг бүрэн хяналтдаа шилжүүлэхийг шаардсаар байгаа бөгөөд Киев удаа дараа татгалзжээ.