Ардчилсан Конгод энэ онд холер өвчнөөр 1800 хүн нас баржээ

Ардчилсан Бүгд Найрамдах Конго улсад энэ онд 60 мянга орчим холерын тохиолдол бүртгэгдэж, 1800 хүн нас барсныг Дэлхийн эрүүл мэндийн байгууллага мэдээлсэн гэж Си Жи Ти Эн телевиз бичжээ.

ДЭМБ-ын Ерөнхий захирал Тедрос Адханом Гебреисус үүнийг тус улсын сүүлийн хэдэн арван жилийн хамгийн хүнд холерын дэгдэлт гэж тодорхойлжээ. Тэрбээр мөргөлдөөнтэй зүүн хэсэгт Эболагийн эсрэг вакцинжуулалтыг эрчимжүүлэхийг онцолжээ.

Тедросын хэлснээр ихэнх тохиолдол зүүн хэсгийн Хойд Киву, Өмнөд Киву мужид бүртгэгдсэн ч өвчин Конго мөрний сав газрын дагуу тархаж, нийслэл Киншасад хүрэх эрсдэлтэй байгаа аж.

Аюулгүй байдлын асуудал болон алслагдсан бүс нутагт хүрэх боломж хязгаарлагдмал байгаа нь хариу арга хэмжээг хүндрүүлж байгаа бөгөөд энэ нь Эболагийн дэгдэлтийг хязгаарлах ажилд ч саад болж байна.

Борооны улирал Киншаса зэрэг хүн ам шигүү суурьшсан бүсэд холерын халдварыг хурдасгаж болзошгүйг ДЭМБ анхааруулжээ.

Дэгдэлтийн нас баралтын түвшин гурван хувь орчим байгаа нь цаг тухайд нь эмчлэх боломжтой өвчний хувьд ер бусын өндөр үзүүлэлт юм.