Аргентины тэнгисийн цэргийн хүчин, агаарын цэргийн хүчнийг Иран “террорист байгууллага” гэж зарлажээ

Аргентины тэнгисийн цэргийн хүчин, агаарын цэргийн хүчнийг “террорист байгууллага” гэж зарласнаа Ираны Гадаад хэргийн яам Лхагва гарагт мэдэгдэв.

DW-ийн мэдээлснээр, Аргентин дөрөвдүгээр сарын эхээр Ираны Исламын хувьсгалын харуулын корпусыг террорист байгууллагад тооцсон юм. Тухайн үед АНУ-ын Ерөнхийлөгч Дональд Трамп Ираны эсрэг дайны дараа холбоотнууддаа ийм алхам хийх шахалт үзүүлж байжээ.

Тегераны шийдвэр “харилцан адил байх зарчимд үндэслэсэн” гэж яам мэдэгдэлдээ дурджээ. Үүнээс үүдэх бүх үр дагаврын хариуцлагыг Аргентины засгийн газар хүлээнэ гэж яам нэмж мэдэгджээ. Мэдэгдэлд Аргентины хуурай замын цэргийн талаар дурдаагүй байна.

Иран 2019 онд тус улсын зэвсэгт хүчнийг террорист бүлэгт тооцсон улсуудын эсрэг хариу арга хэмжээ авах хууль баталсан юм.

Исламын хувьсгалын харуулын корпус Ливанд төвтэй зэвсэгт бүлэглэл Хезболлаг дэмждэг учраас арга хэмжээ авсан гэж Аргентин дөрөвдүгээр сард мэдэгдсэн юм. 1994 онд АМИА еврей нийгэмлэгийн төвд болж, 85 хүний аминд хүрсэн дэлбэрэлтийг Хезболлагийн хийсэн хэрэг гэж Буэнос-Айрес үздэг.

Исламын хувьсгалын харуулын корпусыг 1979 оны Исламын хувьсгалын төгсгөлд шинэхэн тогтсон шиит шашны засаглалыг хамгаалах элит зэвсэгт хүчин болгон байгуулжээ. Тус хүчин олон жилийн турш эдийн засаг, улс төрийн асар том эзэнт гүрэн болж хувирсан байна. Тус хүчин сонгогдсон Ерөнхийлөгчид бус, Ираны дээд удирдагчид шууд захирагддаг. АНУ, Европын холбоо, Их Британи зэрэг улс уг корпусыг террорист байгууллагад тооцдог.