АСЕАН-ы тусгай элч Мьянмарын Гадаад хэргийн сайдтай уулзаж, иргэний дайн, тусламжийн асуудлыг хэлэлцэв
Мьянмарын цэргийн дэмжлэгтэй засгийн газар 2021 оны төрийн эргэлтээс хойш хасагдсан АСЕАН-ы дээд хэмжээний уулзалтад эргэн оролцох эрхээ сэргээхийг хүсэж байна.
Зүүн өмнөд Азийн орнуудын холбоо (АСЕАН)-ы Мьянмар дахь тусгай элч, Филиппиний Гадаад хэргийн сайд Ма Тереса Ласаро аравдугаар сарын 29-нд Нейпьидо хотод Мьянмарын Гадаад хэргийн сайд Тин Маун Сүэтэй уулзжээ. Энэ тухай Си Эн Эй телевиз албан ёсны мэдэгдлүүдэд тулгуурлан мэдээлэв.
Талууд Мьянмар дахь иргэний дайн болон хүмүүнлэгийн тусламж хүргэх боломжийн талаар ярилцсан байна.
Мьянмарын төрийн мэдлийн хэвлэл баасан гарагт Ласаро тус улсын АСЕАН дахь анхны үүрэг, эрхийг сэргээх арга замыг хэлэлцсэн гэж бичсэн. Харин Ласарогийн албаны мэдэгдэлд энэ талаар огт дурдаагүй байна. Мьянмарын засгийн газар наймдугаар сард тус улсад АСЕАН-ы тусгай элч шаардлагагүй болсон гэж мэдэгдэж байв.
Тин Маун Сүэ Мьянмар АСЕАН-ы таван зүйлт энхийн төлөвлөгөөг үндэсний ашиг сонирхол, бүрэн эрхэд нийцүүлэн хэрэгжүүлэхээр ажиллаж байгаа гэж хэлснийг төрийн хэвлэл мэдээлжээ.
Ласаро төрийн эргэлтээр засгийн эрхээс унагаагдсанаас хойш хоригдож буй Нобелийн шагналт Аун Сан Су Читэй уулзахыг хүссэн ч түүний алба уулзалт болсон эсэхийг дурдаагүй.
“Би Аун Сан Су Чигийн байдлыг асуухад тэр сайн байгаа гэсэн нэлээд эерэг хариу авсан” гэж Ласаро хэлсэн гэж түүнтэй хамт аялсан Филиппиний Билёнарё хэвлэл мэдээлжээ.
АСЕАН 2021 оны төрийн эргэлтийн дараа мөргөлдөөнийг намжаахгүй байгаа шалтгаанаар Мьянмарын удирдлагыг дээд хэмжээний уулзалтдаа оролцуулахаа больсон. Төрийн эргэлтээс үүдэлтэй иргэний дайнд ойролцоогоор 100,000 хүн амь үрэгдэж, 3.5 сая гаруй хүн орон гэрээ орхижээ.
АСЕАН-ы удирдагчид 2021 оны дөрөвдүгээр сард тохиролцсон таван зүйлт зөвшилцөлдөө хүчирхийллийг нэн даруй зогсоох, бүх талын бүтээлч яриа хэлэлцээ эхлүүлэх, тусгай элчээр зуучлуулах, хүмүүнлэгийн тусламж үзүүлэх, элч Мьянмарт айлчилж бүх талтай уулзах зэргийг тусгасан юм.
