Австралийн хоёр цагдаа гэмт бүлэглэлийн аюулаас болж Туркийг түр орхих болжээ
Холбооны цагдаагийн эдгээр ажилтан Австралийн хамгийн их эрэн сурвалжлагдаж байсан гэмт хэрэгтнүүдийн нэгийг барихад оролцсон юм.
Австралийн Холбооны цагдаагийн хоёр ажилтан алдартай оргодлыг мөшгиж баривчилсныхаа дараа аюулгүй байдлын үүднээс гэр бүлийнхээ хамт Турк дахь ажлаа орхих шаардлагатай болжээ.
ABC News сайтын мэдээлснээр, нэрийг нь нийтлэх боломжгүй уг оргодол 2022 онд баригдахдаа Австралийн хамгийн их эрэн сурвалжлагдаж буй хүмүүсийн нэг, дэлхийн томоохон гэмт хэрэгтэн гэж тооцогддог байжээ. Өөр нэг хэргийн хүрээнд шүүхэд ирүүлсэн мэдэгдэлд дурдсанаар, Анкарад томилогдсон хоёр ажилтан оргодлыг баривчлахад оролцсоных нь дараа тэднийг түр нүүлгэн шилжүүлсэн аж.
“Анкара дахь албаны ажилтнуудын аюулгүй байдалд санаа зовоосон мэдээлэл ирсэн” гэж Холбооны цагдаагийн ахлах офицер Мари Андерссон мэдэгдэлдээ бичжээ. Ажилтнууд өөр улсад зургаан долоо хоног байсны дараа Турк дахь албандаа буцсан байна. Тэдэнд ямар аюул тулгарсныг дэлгэрүүлээгүй байна.
Энэ ажиллагааг Истанбулд төвлөрсөн гэмт бүлэглэлд Холбооны цагдаа онцгой анхаарч байх үед хийсэн юм. “Aussie Cartel” хэмээн нэрлэгдсэн уг бүлэглэл арав шахам жил Австралийн эрх баригчдаас нуугдаж байжээ. Цагдаа нар уг бүлэглэлийг Австрали руу их хэмжээний мансууруулах бодис оруулж, Ази, Европыг хамарсан холбоо харилцааны сүлжээтэй гэж сэжиглэж байна.
Андерссоны мэдэгдэл Сиднейн гэмт бүлэглэлийн гишүүн гэх Масуд Закариа хоёр хүн амины хэргийн яллагдлыг хэрэгсэхгүй болгуулах гэсэн оролдлогын хүрээнд ил болжээ. Холбооны цагдаа 2023 онд түүнийг буцаахын тулд Skytraders, Hart International компаниудад 1 сая доллар төлж, хууль бусаар албадан гаргасан гэж Закариа маргаж байна. Андерссон түүнийг 2023 онд буцаах ажиллагаанд ямар нэг зөрчил гаргаагүй гэж үгүйсгэжээ.
Мэдэгдэлд дурдсанаар, гэмт бүлэглэлийг Сиднейн мотоциклийн бүлэглэлийн гишүүн асан Хакан Айик тэргүүлж байжээ. Туркт баривчлагдсан Айик 262 жилийн хорих ял авч болзошгүй байна. Айик 2021 онд Холбооны цагдаагийн чагнуулын төхөөрөмжтэй утсыг хамсаатнууддаа өөрөө мэдэлгүй тарааж байсан нь илэрснээр түүний гэмт сүлжээ нуран унасан юм.
