Тасманид исгэсэн сүүлийн James Boag шар айраг дуудлага худалдаагаар 1300 доллараар зарагдлаа
Шар айргийн үйлдвэр 145 жил ажилласны эцэст хаалгаа барьжээ.
Тасмани мужид исгэсэн James Boag шар айргийн сүүлийн хайрцаг, лааз дуудлага худалдаагаар 1300 доллараар зарагджээ.
ABC News сайтын мэдээлснээр, Лонсестон хотын алдартай үйлдвэрт исгэсэн Boag's Red шар айргийн сүүлийн лааз, хайрцгийн эзэн нь тус үйлдвэрт 14 жил ажилласан цахилгаанчин асан Сэм Кокс болжээ. Boag's Red-ийн нэг хайрцаг ойролцоогоор 70 доллараар зарагддаг.
Толгой компани болох Lion 2024 онд James Boag-ийн үйлдвэрлэлийг Австралийн эх газар руу шилжүүлсэн ч Тасманид нийлүүлэх бүтээгдэхүүнийг орон нутагт исгэсээр байжээ. Австралийн шар айргийн зах зээл удаан хугацаанд буурч, үйлдвэр хүчин чадлынхаа тавны нэг орчмоор ажиллах болж, ашиггүй болсон тул Лонсестоны үйлдвэрээ хаахаа компани зургаадугаар сард зарласан байна.
145 жил ажилласан үйлдвэр сүүлийн шар айргаа өнгөрсөн сард савлаж, өнгөрсөн долоо хоногт хаагджээ. Кокс шар айргийг уухгүй, харин хамгийн тод харагдах газар дэлгэн тавина гэжээ. “Би үүнээс салахгүй” гэж тэрбээр хэлэв.
Кокс сүүлийн 44 ажилтны нэг байсандаа бахархаж, Крэдл уулын дүрсийг дэвсгэр болгон James Boag-ийн лого, үйлдвэрийн ажилласан онуудыг дүрсэлсэн шивээс хийлгэжээ.
