Qantas 850 ажлын байраа Энэтхэг рүү шилжүүлэхээ зарлаж, Австралийн томоохон компаниудын эгнээнд нэгдлээ
Хямд цалин, асар их ажиллах хүчинд татагдан Австралийн компаниуд Энэтхэгт салбар нээсээр байна.
Австралийн Qantas агаарын тээврийн компани дотоодын 850 ажлын байрыг Энэтхэг рүү шилжүүлэхээ зарласан нь оффисын ажлын байрыг гадаад руу шилжүүлж буй давалгааны хамгийн сүүлийн жишээ болжээ.
NAB, Westpac, Telstra, Квинсландын банк, Coles, Officeworks, Qantas зэрэг компаниуд сүүлийн жилүүдэд Австрали дахь ажлын байраа цөөлж, Ази руу шилжүүлэх төлөвлөгөөгөө зарласан байна. Ихэнх нь үүнийг дэлхийн чадавхын төв (GCC) гэгдэх салбараараа дамжуулан хэрэгжүүлж байна.
GCC нь гадаадын компанийн охин салбар юм. Ийм салбараар дамжуулан компани гуравдагч талтай гэрээ хийлгүйгээр бизнесээ бүрэн хяналтдаа байлгадаг.
Bunnings 2020 онд Энэтхэгт GCC байгуулах төлөвлөгөөгөө зарласан ч ажлын байр цөөлөхөө хараахан мэдэгдээгүй. Kmart 2018 онд ийм төв нээжээ.
Зардал өсөн нэмэгдэж, хиймэл оюун ухааныг хурдацтай нэвтрүүлж буйтай холбоотойгоор ажлын байрыг шилжүүлэх шаардлагатай болсон гэж компаниуд тайлбарлажээ. Санхүүгийн салбарын үйлдвэрчний эвлэл компаниудын ашиг огцом өсч байхад хийж буй цомхотголыг “хэрцгий”, “өршөөлгүй” гэж шүүмжилсэн байна.
Дэлхийн GCC-ийн 50 орчим хувь Энэтхэгт байдаг. Австралийн компаниуд Энэтхэг дэх GCC-дээ 30 мянга орчим хүнийг шууд ажиллуулж байна гэж Энэтхэг дэх Австралийн Дээд комиссар Филип Грин 2024 онд тооцоолжээ.
“Энгийнээр хэлбэл, GCC гэдэг нь компани өөр нэг оффис байгуулж байгаа хэрэг. Гэрээт ажилтан хөлслөхийн оронд ажилтнаа өөрөө авч байна гэсэн үг” гэж Энэтхэгт GCC байгуулахад тусалдаг ANSR компанийн гүйцэтгэх захирал Лалит Ахужа хэлэв.
Ахужагийн хэлснээр, цагаачлалын хязгаарлалт чангарч буй нь энэ хандлагыг хурдасгаж байна. Компаниуд мэргэжилтэй ажилчдыг Австрали руу цагаачлахыг хүлээхийн оронд чадвартай хүмүүс байгаа газар руу үйл ажиллагаагаа шилжүүлж байна.
“Хэзээ нэгэн цагт Австралийн томоохон компанийн зарим гол удирдагч Бангалор эсвэл Хайдарабадад сууж байх бүрэн боломжтой” гэж Ахужа хэлжээ.
“Энэтхэгийг Австралитай харьцуулбал дундаж цалин нь Австралид төлөх ёстой хэмжээний гуравны нэг юм” гэж Колката дахь Observer Research Foundation-ий залуу судлаач Аря Рой Бардхан тайлбарлажээ.
Энэтхэгийн Гадаад худалдааны хүрээлэнгийн туслах профессор, доктор Кануприя үүнийг зардал хэмнэх арга хэмжээ төдийгүй Энэтхэгийн олон төрлийн чадвартай ажиллах хүчийг ашиглах боломж гэж үзжээ.
Энэтхэгийн Боловсролын яамны мэдээгээр тус улс жил бүр инженер, технологийн 830 мянга орчим төгсөгч бэлтгэдэг. Тус улсад 2100 гаруй GCC ажиллаж, 2.3 сая хүнийг ажлын байраар хангаж байна гэж Сангийн сайд Нирмала Ситхараман энэ оны эхээр мэдэгджээ.
Ойрын гурван жилд Австралийн илүү олон компани Энэтхэгт салбар нээнэ гэж Ахужа таамаглаж байна. Хиймэл оюун ухаан цөөн ажилтнаар илүү их ажил хийх боломж олгож, програм хангамж, нягтлан бодох бүртгэл, захиргааны ажлын байранд нөлөөлж болзошгүйг ч тэрбээр хүлээн зөвшөөрчээ.
“GCC-ийн мэдээллийг харвал орлого нь ажилтны тооноос хурдан өсөж байна, өөрөөр хэлбэл ажилчид илүү бүтээмжтэй болж байна. Энэ хандлага үргэлжилбэл эцэст нь GCC-үүд Энэтхэгт цөөн хүн ажилд авах магадлалтай” гэж Бардхан хэлэв.
