Бангладешийн гэрэл зурагчин Дубайн Hipa уралдааны 200 мянган ам.долларын тэргүүн шагналыг хүртлээ

Дубайд болсон Хамдан бин Мохаммед бин Рашид Аль Мактумын нэрэмжит олон улсын гэрэл зургийн 15 дахь удаагийн уралдааны (Hipa) 200 мянган ам.долларын тэргүүн шагналыг Бангладешийн гэрэл зурагчин Пину Рахман хүртжээ.

Жил бүр болдог энэ уралдаан дэлхийн гэрэл зурагчдад нийт 1 сая ам.долларын шагнал олгосон байна.

Рахманы зурагт хүчтэй түймрийн дараа үлдсэн бетон хананы дунд унтаж буй гэр бүл харагдана. Түймэр 2025 оны арваннэгдүгээр сарын 25-нд Дакагийн хамгийн том, хүн ам шигүү албан бус суурьшлын нэг болох Корайлд гарсан юм.

Гал сөнөөгчид түймрийг 16 цагийн турш унтраажээ. Түймэр 1500 орчим байшинг сүйтгэж эсвэл гэмтээж, мянга мянган оршин суугчийг орон гэргүй болгосон байна. Корайлын оршин суугчдын олонх нь бага орлоготой хүмүүс бөгөөд тэдний дунд уур амьсгалтай холбоотой гамшгийн улмаас орон гэрээсээ дүрвэн ирсэн хүмүүс бий.

АНЭУ 2026 оныг Гэр бүлийн жил болгон зарласантай уялдуулан энэ жилийн уралдааныг Гэр бүл сэдвээр зохион байгуулжээ. Гэр бүлийн тэсвэр хатуужлыг харуулсан энэ зураг шалгарсан байна.

Тэргүүн шагналыг Рахманд шейх Мохаммед бин Рашид бин Мохаммед бин Рашид Аль Мактум гардуулав. Ёслол Дубайн угсаа залгамжлагч ханхүү, Ерөнхий сайдын орлогч, Батлан хамгаалахын сайд шейх Хамдан бин Мохаммедын ивээл дор болжээ.

“Арван таван жилийн ойгоо тэмдэглэж буй энэ үед Hipa-гийн гэрэл зургийн архив нэг сая гаруй зурагтай болсныг бахархан зарлаж байна. Эдгээр зургийг 209 орны хагас сая гаруй гэрэл зурагчнаас бүрдсэн идэвхтэй нийгэмлэг оруулсан” гэж Hipa-гийн ерөнхий нарийн бичгийн дарга Али бин Талит хэлэв.

Гэр бүл төрөлд Эмиратын гэрэл зурагчин Хамид Обайд Аль Али усан доор авсан зургаараа тэргүүлжээ. Зурагт хавч нил ягаан далайн хөвөн дотор бөөн жижиг өндгийг том сарвуугаараа хамгаалан тэвэрч байгаа харагдана. Саудын Арабын Наваф Алосаими хоёрдугаар, Энэтхэгийн Субхажит Датта гуравдугаар байрт оров.

Цуврал зургийн төрөлд Палестины гэрэл зурагчин Юсеф Алзанун нэгдүгээр байр эзэлж, Америкийн Брент Стиртон хоёрдугаар, америк сансрын нисгэгч, гэрэл зурагчин Дон Петтит гуравдугаар байрт шалгарсан байна.

Зураг бүтээхэд хиймэл оюун ухааны үүрэг нэмэгдэж байгааг харгалзан уралдаанд Dreams Through AI төрлийг зохион байгуулжээ. Энэ төрөлд Шинэ Зеландад суурьшсан гэрэл зурагчин Чи Хүй Тан тэргүүлсэн байна.

Японы гэрэл зурагчин Казүёши Номачи тавин жил гаруй үргэлжилсэн уран бүтээлийнхээ төлөө Талархлын шагнал хүртжээ.

Францын фото сэтгүүлч Вероник де Вигери дайн, дарлал, мөргөлдөөнд өртсөн хүмүүсийг баримтжуулсан бүтээлээрээ Hipa-гийн оны шилдэг гэрэл зурагчнаар тодорсон байна.