Бельгид бичиг баримтгүй цагаачдыг гаргахаар цагдаа гэрт хүчээр нэвтэрч болох хуулийг идэвхтнүүд “айдсын хууль” гэв

Бельгийн парламент цагдаа нарт бичиг баримтгүй хүмүүсийг албадан гаргахын тулд орон сууцанд хүчээр нэвтрэх эрх олгосон хууль баталжээ. Үүний дараа тус улсад АНУ-ын Цагаачлал, гаалийн албаных шиг гэрт дайрч орох явдал гарч болзошгүй гэж хүний эрхийн идэвхтнүүд анхааруулсныг Гардиан сонин мэдээлжээ.

Өнгөрсөн Баасан гарагт явагдсан санал хураалтаас өмнө тус улсад 60 гаруй жагсаал болсон бөгөөд төрийн бус байгууллага, шүүгчид, хуульчдын холбоод уг арга хэмжээг шүүмжилжээ.

Ирэх хаврын улиралд хүчин төгөлдөр болох хуулиар Бельгийн цагаачлалын алба бичиг баримтгүй хүнийг байрлуулж байж болзошгүй орон сууц, тэр дундаа цагаачдыг найз нөхөд, гэр бүлийнхэн нь байрлуулж буй гэрт нэвтрэх зөвшөөрлийг мөрдөн байцаах шүүгчээс хүсч болно.

Зөвшөөрөл авсны дараа цагдаа нар өглөөний 5 цагаас оройн 9 цагийн хооронд, хүүхдийн дэргэд ч гэсэн оршин суугчдын зөвшөөрөлгүйгээр гэрт нэвтэрч, хүмүүсийг саатуулж, хүний бичиг баримт хайж болно.

“Энэ бол айдсын хууль” гэж Олон улсын Амнести байгууллагын Бельгийн франц хэлтэй салбарын захирал Карин Тибо хэлжээ.

Уг арга хэмжээ нь Бельгид орогнол авч чадаагүй, улсаас гарах тушаалыг үл тоосон, нийгмийн хэв журам, үндэсний аюулгүй байдалд заналхийлэгч гэж үзэгдсэн хүмүүст чиглэнэ гэж албаныхан мэдэгджээ. Харин нийтэд заналхийлэх гэдгийг хуульд хэрхэн тодорхойлсон нь бүрхэг байна гэж шүүмжлэгчид үзэж байна.

Нидерланд, Герман зэрэг оронд ижил төстэй хатуу арга хэмжээ аль хэдийн хэрэгжиж байгаа бөгөөд Европын холбооны саяхан баталсан цагаачдыг буцаах тухай журамд ч ижил төстэй заалт багтсан гэж Киара Кателли онцолжээ. Тэрбээр Брюссельд төвтэй, бичиг баримтгүй цагаачдын асуудлаарх олон улсын хамтын ажиллагааны платформын ажилтан юм.