Брокеруудын зөрүүтэй таамаг Солонгосын хөрөнгө оруулагчдыг төөрөгдүүлж байна

Өмнөд Солонгосын Коспи индекс огцом хэлбэлзэж байгаа энэ үед дотоодын болон гадаадын үнэт цаасны компаниуд зах зээлийн таамаг, хувьцааны зорилтот үнээ удаа дараа өөрчилж байгаа нь жижиг хөрөнгө оруулагчдыг төөрөгдүүлж байна. Энэ тухай Корея Таймс сонин мэдээлэв.

Гёнги мужийн Гүри хотын 44 настай Лим өнгөрсөн жилээс хувьцаанд идэвхтэй хөрөнгө оруулж эхэлсэн ч одоо аль тайланд итгэхээ мэдэхгүй болжээ. “Одоо заримдаа ойр дотныхоноосоо эсвэл хиймэл оюуны хэрэгслээс зөвлөгөө авдаг болсон” гэж тэрбээр хэлсэн байна.

Коспи 6 дугаар сарын 18-нд анх удаа 9,000 пунктийг давж, 9,063.84 пунктэд хаагдсан ч дараа нь 5,000-ын түвшин рүү унажээ. 6 дугаар сард индекс 10,000 хүрнэ гэж таамаглаж байсан зарим брокер 5 сарын дотор таамгаа 4,000 гаруй пунктээр бууруулсан байна.

Лхагва гарагт Коспи 136.23 пункт буюу 2.60 хувиар өсч, 5,375.36 пунктэд хаагдсан бол Косдак 5.62 хувиар өсч, 705.10 пунктэд хүрчээ.

Дотоодын брокерууд зах зээлийн хандлагыг урьдчилан таамаглахын оронд хөдөлгөөнийг нь дагаж, өсөлтийн үед зорилтот үнээ өсгөж, уналтын дараа бууруулдаг аж. 9 дүгээр сарын 30-наас 11 дүгээр сарын 10-ны хооронд Коспи 6,838.04-өөс 5,239.13 болж, 23 орчим хувиар унахад брокерууд зорилтот үнэ бууруулсан 1,572 тайлан гаргасан бол өсгөсөн нь ердөө 419 байжээ.

Ирэх оны Коспигийн таамаг ч ихээхэн зөрүүтэй байна. КБ Секьюритиз 5,100-аас 9,000, Хёндэ Мотор Секьюритиз 6,000-аас 10,500, Юаньта Секьюритиз 6,000-аас 10,000 пункт байна гэж таамаглажээ.

Морган Стэнли Даваа гарагт Эс Кей Хайниксийн зорилтот үнийг 2.6 сая воноос 1.6 сая вон болгож 38 хувиар, Самсунг Электроникс-ийнхийг 381,000 воноос 309,000 вон болгож 19 хувиар бууруулжээ. Харин Номура 10 дугаар сарын 20-ны тайландаа Эс Кей Хайниксийн зорилтот үнийг 4.7 сая вон, Самсунгийнхийг 670,000 вон хэвээр үлдээсэн байна.

Зөрүү нь санах ойн чипийн зах зээлийн талаарх ялгаатай хүлээлтээс үүдэлтэй юм. Морган Стэнли шинэ хүчин чадал ашиглалтад орсноор санах ойн хомсдол 2028 онд саарна гэж үзэж байгаа бол Номура өгөгдлийн төвийн эрэлтээс болж хомсдол дор хаяж 2028 он хүртэл үргэлжилнэ гэж таамаглажээ.