Жи Эс групп, Поско хиймэл оюуны өгөгдлийн төвийн төслүүдэд хамтран ажиллахаар болжээ

Өмнөд Солонгосын Жи Эс групп, Поско компани хиймэл оюуны өгөгдлийн төвийн зах зээлд стратегийн түншлэл байгуулах санамж бичигт гарын үсэг зурснаа Лхагва гарагт мэдэгджээ. Энэ тухай Корея Таймс сонин мэдээлэв.

Түншлэл нь Жи Эс группийн өгөгдлийн төв барих, ажиллуулах туршлагыг Поско-гийн өндөр чанартай ган материал, технологийн шийдэлтэй хослуулах юм. Гарын үсэг зурах ёслолд Жи Эс группийн дэд дарга Хон Сун Ги, Поско-гийн гүйцэтгэх захирал Ли Хи Гын нар оролцжээ.

Хоёр компани томоохон өгөгдлийн төв барих үед тоног төхөөрөмж, материалын нийлүүлэлтийн саатлыг багасгаж, материал сонголт, зураг төслийг оновчтой болгон барилгын хугацаа, зардлыг бууруулахаар төлөвлөжээ. Мөн Жи Эс Глобал, Поско-гийн гадаадын сүлжээг ашиглан гадаадын төслүүдэд хамтран материал, тоног төхөөрөмж нийлүүлэх боломж хайх юм.

“Хиймэл оюуны өгөгдлийн төв тогтвортой цахилгаан хангамж, хурдан барилга, үр ашигтай үйл ажиллагаанд олон салбарын чадамж шаарддаг” гэж Хон хэлжээ. Ли хиймэл оюуны өгөгдлийн төв дэлхийн ган, материалын эрэлтийг өсгөх шинэ өсөлтийн салбар гэж онцолсон байна.

Жи Эс групп охин компаниараа дамжуулан Ганвон мужийн Тонхэ хотод 2.4 гигаваттын өгөгдлийн төвийн төсөл хэрэгжүүлж байгаа юм. Тус групп 9 дүгээр сард төслийн эхний шатанд ойролцоогоор 15 их наяд вон (11.23 тэрбум ам.доллар) хөрөнгө оруулахаа зарлаж, 10 дугаар сард 100 мегаваттын анхны өгөгдлийн төвийн барилгын зөвшөөрөл авсан байна.

Поско энэ онд хиймэл оюуны өгөгдлийн төв, цахилгааны сүлжээний бизнесийн боломжийг судлах алба байгуулж, өгөгдлийн төвд зориулсан нэмүү өртөг өндөртэй ган материал, шийдлийн хөгжүүлэлтээ өргөжүүлж байна.