Өмнөд Солонгос Азийн хөгжлийн банкны хиймэл оюуны санд 20 сая ам.доллар оруулна

Өмнөд Солонгос хиймэл оюуны хөгжлийн төслүүдийг дэмжих Азийн хөгжлийн банкны итгэлцлийн санд 20 сая ам.доллар оруулахаа амласныг Сангийн яам Лхагва гарагт мэдэгджээ. Энэ тухай Ёнхап агентлаг мэдээлэв.

Сангийн яам Сөүлд Азийн хөгжлийн банктай жил бүрийн зөвлөлдөх уулзалт хийж, Хөгжлийн төлөөх Солонгосын хиймэл оюуны итгэлцлийн санд хандив оруулах гэрээнд гарын үсэг зуржээ.

Сан нь 5 дугаар сард банктай байгуулсан гэрээгээр Өмнөд Солонгост байгуулагдах Хиймэл оюуны инноваци, хөгжлийн төвийн үйл ажиллагааг дэмжих зорилготой юм.

Уулзалтын үеэр Олон улсын эдийн засгийн асуудал хариуцсан дэд сайд Мун Жи Сон тус улсын албан ёсны хөгжлийн тусламжийн бодлогыг танилцуулжээ. Банкны дэд ерөнхийлөгч Ю Хэ Гён хиймэл оюун, дижитал шилжилт, хувийн хэвшлийн хөгжил, уур амьсгалын өөрчлөлтийн чиглэлээр Өмнөд Солонгостой хамтын ажиллагаагаа өргөжүүлэх хүсэлтэй байгаагаа илэрхийлсэн байна.