Солонгос элсэлтийн шалгалтаар хиймэл оюунтай шил илрүүлэх ажилтнуудыг сургаж байна

Өмнөд Солонгосын коллежийн элсэлтийн шалгалт долоо хоног орчмын дараа болох гэж байгаа тул боловсролын байгууллагууд хиймэл оюунтай ухаалаг нүдний шилийг илрүүлэх ажилтнуудыг сургаж байна. Энэ тухай Корея Таймс сонин мэдээлэв.

Сөүл хотын Боловсролын газар 11 дүгээр сарын 19-ний шалгалтын үеэр хотын 228 шалгалтын байранд ухаалаг шил илрүүлэх 239 ажилтныг сургахаа Лхагва гарагт мэдэгджээ. Энэ жил радио давтамжийн илрүүлэгч өгөхгүй тул хяналтын ажилтнууд гол төлөв биечлэн шалгах юм.

Боловсролын яам улсын хэмжээний 1,312 шалгалтын байр бүрт ухаалаг шил илрүүлэх тусгай ажилтан томилно. Шалгалтын өмнө сэжиг төрвөл сурагчаас шилээ тайлж ширээн дээр тавихыг хүсч, томилогдсон ажилтан шалгах бөгөөд шалгалтын үеэр төрсөн сэжгийг хичээл дууссаны дараа шалгах юм.

“Үнэнийг хэлэхэд одоогийн арга хэмжээ хуурахыг бүрэн зогсооход хангалтгүй гэж бодож байна” гэж Чонжү хотын нэгэн ахлах сургуулийн багш нэрээ нууцлах нөхцөлтэйгээр хэлжээ. Түүний хэлснээр, нүдээр шалгахад илт төхөөрөмжийг илрүүлж болох ч нууц загваруудыг алгасаж мэдэх бөгөөд энгийн шил ч төмөр хүрээтэй байдаг тул металл илрүүлэгч ч хязгаарлагдмал аж.

Солонгосын Багш, боловсролын ажилтны үйлдвэрчний эвлэлийн өнгөрсөн сард нийтэлсэн санал асуулгаар, дунд, ахлах сургуулийн багш нарын 82.3 хувь нь одоогийн журмаар ухаалаг шил зүүсэн сурагчдыг илрүүлэхэд хэцүү гэж хариулжээ.

Яам ирэх жил хөгжүүлэлтийн шатанд буй илрүүлэх төхөөрөмжүүдийн тохиромжтой эсэхийг үнэлсний дараа ашиглах асуудлыг судлах юм.

Шалгалтын байранд хиймэл оюунтай шил, утас, ухаалаг цаг, утасгүй чихэвч зэрэг бүх цахим төхөөрөмжийг хориглосон. Хиймэл оюунтай шил зүгээр л авч явсан ч үр дүнг хүчингүй болгох бөгөөд яам хуурсан хүнийг шалгалтад оруулахгүй хугацааг нэгээс гурван жил болгон сунгах хуулийн өөрчлөлт хийхийг судалж байна.