Бюро 1440 компани Хойд тэнгисийн замд хиймэл дагуулын холбоог туршжээ

Оросын сансрын Бюро 1440 компани ГлавСевморпуть, Атомфлот, Холбооны эмнэлэг-биологийн агентлагтай хамтран Хойд тэнгисийн замд хиймэл дагуулын холбоог амжилттай туршжээ. Энэ тухай Ведомости сонин мэдээлэв.

Компанийн хэвлэлийн албаны мэдээлснээр, Урал атомын мөс хагалагч хөлгийг холбохдоо анх удаа компанийн өөрийн хиймэл дагуулын болон газрын дэд бүтцийг ашигласан байна.

Хөлөг дээр суурилуулсан терминалын тусламжтайгаар хөлгийн ахмад Виктор Сурядов Мурманск дахь Атомфлотын нөхцөл байдлын төвтэй видео хурал хийж, мөсний нөхцөл байдлын талаар мэдээлжээ. Мөн хөлөг дээрх эмч нар Москва дахь агентлагийн мэргэжилтнүүдтэй зайны эмнэлгийн зөвлөгөө хийж, багийн гишүүний оношилгооны үр дүнг дамжуулсан байна.

Компанийн дэд ерөнхий захирал Дмитрий Агафоновын хэлснээр, туршилт Арктикийн хүнд нөхцөлд систем ажиллах чадвартайг баталжээ. Компани цаашид Хойд тэнгисийн замын бүх хэсэгт, тэр дундаа өндөр өргөргийн маршрутад хөлөг онгоцуудыг өргөн зурвасын интернэтээр хангахыг зорьж байна.

Ерөнхий сайд Михаил Мишустин 11 дүгээр сарын 10-нд Рассвет өргөн зурвасын интернэтийн системд Оросын 30 орчим хиймэл дагуул багтаж байгааг мэдэгдсэн юм. Бюро 1440 компани 10 дугаар сарын 8-нд Норникелийн алслагдсан үйлдвэрүүдэд хиймэл дагуулын холбоог туршиж эхэлсэн бөгөөд үйлчилгээг 2027 онд арилжааны журмаар ашиглаж эхлэхээр төлөвлөжээ.