Орост энэ онд арилжааны сүүний үйлдвэрлэл өсөхгүй гэж Союзмолоко таамаглажээ

Оросын арилжааны сүүний үйлдвэрлэл мал сүргийн тоо буурч, хөрөнгө оруулалт удааширсны улмаас энэ онд 2025 оны түвшинд үлдэж мэднэ гэж Сүү үйлдвэрлэгчдийн үндэсний холбооны (Союзмолоко) ерөнхий захирал Артём Белов мэдэгджээ. Энэ тухай Интерфакс агентлаг мэдээлэв.

“Гэвч энэ онд арилжааны сүүний өсөлт эрс саарч байгаа, манай таамгаар өсөлтгүй анхны жил болох магадлалтай” гэж Белов Сибирийн хөдөө аж ахуй, хүнсний форумын үеэр Лхагва гарагт хэлжээ. Түүний хэлснээр, сүүлийн 10 жилд үйлдвэрлэл жилд дунджаар 2.5-аас 3.5 хувиар өсч байжээ.

Оросын хөдөө аж ахуйн байгууллагууд өнгөрсөн жил 20.8 сая тонн арилжааны сүү үйлдвэрлэсэн байна. Хөдөө аж ахуйн байгууллагуудад үйлдвэрлэл өсч байгаа ч иргэдийн аж ахуйд буурч, жижиг аж ахуйд мал сүргийн тоо цөөрөхийн зэрэгцээ энэ онд малын эрүүл мэндийн эрсдэл нэмэгджээ.

Белов салбар түүхий сүүний үнэ нэлээд өндөр үе рүү орж байгааг онцлоод, эрэлт, экспорт өсч байгаа нь эерэг хандлага гэжээ.

Түүний илтгэлд дурдсанаар, энэ оны эхний есөн сард Оросын арилжааны сүүний нийт үйлдвэрлэл өмнөх оны мөн үеэс 2 хувиар өссөн ч мал сүргийн тоо 3 хувиар буурчээ. Новосибирск мужид үйлдвэрлэл, мал сүргийн тоо хоёулаа 14 хувиар, Алтайн хязгаарт 7, 10 хувиар буурсан байна.

Росстатын мэдээгээр, 2025 онд Оросын сүүний нийт үйлдвэрлэл 0.5 хувиар өсч, 34.2 сая тонн болсон юм. Хөдөө аж ахуйн байгууллагуудад 4 хувиар өсч 21.5 сая тонн, иргэдийн аж ахуйд 5.1 хувиар буурч 10.4 сая тонн болжээ.