Дэлхийн банкуудын удирдагчид Хонконгийг Хятад, дэлхийн хоорондох гарц болсонд нь магтжээ

Дэлхийн томоохон банкуудын удирдагчид Хонконгийг Хятадын эх газар, дэлхийн бусад орны хоорондох гарцын үүрэг гүйцэтгэж байна гэж магтжээ. Энэ тухай Ар Ти Эйч Кей мэдээлэв.

Дэлхийн санхүүгийн удирдагчдын хөрөнгө оруулалтын дээд хэмжээний уулзалтын хэлэлцүүлэгт Стейт Стрит банкны дарга, гүйцэтгэх захирал Рональд О'Ханли цар тахал, дэлхийн мөргөлдөөнөөс үүдсэн тодорхойгүй байдлаас болж худалдааны хэв маяг өөрчлөгдсөнийг дурджээ.

Түүний хэлснээр, зээлдэгчид болон хөрөнгө босгогчид нийлүүлэлтийн сүлжээ, санхүүжилтээ бүрдүүлэхдээ илүү аюулгүй сонголт хайж, нөөцтэй байх чиглэлд шилжиж байна.

«Хамгийн их өөрчлөлт Хятадын үүрэг дээр гарч байгаа бөгөөд Хонконг бол түүний гарц юм» гэж О'Ханли хэлжээ.

Барклейс группын гүйцэтгэх захирал Си Эс Венкатакришнан компаниуд сүүлийн арван жилд стратегийн импортоос хамаарах хамаарлаа бууруулж байгааг тэмдэглэжээ. Олон улсын төдийгүй дотоодын санхүүгийн төв болох хот улс орнуудад энэ хамаарлаа зохицуулахад тусалж чадна гэж тэрбээр үзсэн байна.

«Олон улсын санхүү хамаарлын стратегийн задралд орооцолдохгүйн тулд Хонконг шиг олон улсын санхүүгийн төвүүд шударга, ил тод зохицуулалттай байж, өсөлтийг дэмжин, үйл ажиллагаа явуулахад хялбар нөхцөл бүрдүүлэх нь чухал гэж бодож байна» гэж Венкатакришнан хэлжээ.

БНП Париба банкны дарга Жан Лемьер эх газрын компаниуд Европт улам олноор үйл ажиллагаа явуулж байгааг дурдсан байна. Түүний хэлснээр, юанийн төв болох Хонконг нь Хятад, Европыг холбож, эдгээр компанид евро олж авах, Европын зах зээлийг илүү сайн ойлгоход тусалдаг аж.