Эстони Оростой хиллэдэг бүс нутагт 150 орчим хамгаалалтын бункер барихаар болжээ

Эстонийн эрх баригчид Балтийн хамгаалалтын шугам байгуулах хүрээнд Оростой хиллэдэг Ида-Вирумаа мужид 150 орчим хамгаалалтын бункер барихаар төлөвлөжээ. Энэ тухай Ведомости сонин мэдээлэв.

Батлан хамгаалахын сайд Мартин Херемийн парламентад хэлснээр 100 орчим байгууламжийг төрийн газарт, 50-ийг нь орон нутгийн болон хувийн газарт байрлуулна. Хувийн газарт барих бол эрх баригчид эзэдтэй нь түрээс, газар худалдан авах эсвэл нөхөн олговор олгох талаар тохиролцох бөгөөд Нарва голын дагуу их хэмжээний газар худалдан авахгүй аж.

Эстонийн Батлан хамгаалах яам 2024 оны нэгдүгээр сард зүүн хилдээ 600 орчим бункер барих төлөвлөгөөгөө зарласан юм.

Файнэншл Таймс сонин аравдугаар сарын 5-нд Эстони «идэвхтэй хамгаалалтын» үзэл баримтлалын хүрээнд элит ангиудынхаа нэг хэсгийг Оросын хил рүү ойртуулж байна гэж мэдээлжээ. Нэг ангийг Оросоос 50 орчим километрийн зайд орших Йыхви хотод байрлуулахаар төлөвлөж байгаа бол Нарва хотод 1000 орчим хүний цэргийн бааз барьж байна.

Мөн тэр өдөр АНУ улсын хилийн хамгаалалтыг бэхжүүлэх зорилгоор Эстонид 13 тагнуулын нисгэгчгүй онгоц хүлээлгэн өгсөн байна.