Европын комисс «Хойд урсгал» хийн хоолойгоор нийлүүлэлт сэргээхийг үгүйсгэжээ

«Хойд урсгал» хийн хоолойгоор Украин дахь мөргөлдөөн дууссаны дараа ч Европ руу хий нийлүүлэхгүй гэж Европын комиссын албан ёсны төлөөлөгч Паула Пинью сэтгүүлчдэд мэдэгджээ. Энэ тухай Ведомости сонин мэдээлэв.

«Бидэнд Оросоос хий импортлохыг хориглосон хууль аль хэдийн мөрдөгдөж байгаа бөгөөд энэ нь хүчинтэй хэвээр байна» гэж Пинью хэлсэн байна.

Европын комиссын эрчим хүчний асуудал хариуцсан төлөөлөгч Анна-Кайса Итконен Европын холбоо 2027 оны эцэс гэхэд Оросын хийнээс бүрэн татгалзах бодолтой гэж нэмж хэлжээ.

Европын комиссын дарга Урсула фон дер Ляйен аравдугаар сарын 6-нд Европын холбооны орнуудын Оросын хийн импорт 45 хувиас 12 хувь болж буурсан бөгөөд оны эцэс гэхэд тэг болно гэж мэдэгдсэн байна.

Эрчим хүчний асуудал хариуцсан комиссар Дан Йоргенсен аравдугаар сарын 27-нд Орос, Украин энхийн гэрээ байгуулсан ч 2027 онд хүчин төгөлдөр болох Оросын эрчим хүчний импортын хоригийг хадгална гэж мэдэгдсэн юм. Мөн тэрбээр дэлхийн зах зээлийн тогтворгүй байдал, түлшний хомсдлоос болж ирэх өвөл хүнд байж болзошгүйг анхааруулжээ.

Экономист сэтгүүлийн аравдугаар сарын 5-ны мэдээллээр Европын хийн агуулахууд ойролцоогоор 72 хувь дүүрсэн нь жилийн энэ үеийн хамгийн доод түвшин байжээ.