Финляндад гарсан түймрийн улмаас улсын үрийн төмсний нөөцийн тавны нэг шатжээ

Финляндын Хойд Остроботни мужийн Тюрнявя хотод гарсан түймрийн улмаас тус улсын үрийн төмсний нөөцийн тавны нэг хүртэлх хэсэг шатсаныг Финляндын Юле телевизийг иш татан Интерфакс агентлаг мэдээлжээ.

Пүрэв гарагийн орой 4 мянган метр квадрат хүртэл талбайтай агуулахын цогцолбор шатжээ. Түүний дөрвөн танхимд 4 сая гаруй кг төмс хадгалж байсны дийлэнх нь үрийн төмс байв.

«Түймэр дотоодын болон гадаадын зах зээлд хоёуланд нь нөлөөлнө» гэж Финляндын Хүнсний газрын хөдөө аж ахуйн үйлдвэрлэлийн хэлтсийн захирал Ханна Кортемаа хэлжээ.

Тюрнявя болон хөрш Лиминка нь Финляндын үрийн төмсний 70-75 орчим хувийг үйлдвэрлэдэг бөгөөд жилийн үйлдвэрлэл бараг 20 сая кг байдаг. Европт ийм бүс нутаг Герман, Ирланд, Азорын арлуудад л бий.