Гаитид хүчирхийллээс дүрвэсэн 3000 орчим хүн хуучин сургуульд хоргодож байна
Гаитийн хүн амын 12 орчим хувь буюу 1.5 сая хүн гэр орноо орхисон ч хүмүүнлэгийн тусламжийн төлөвлөгөөний дөнгөж тал нь санхүүжжээ.
Гаитийн нийслэл Порт-о-Пренс хотод нэгэн цагт 500 орчим сурагчтай байсан сургууль одоо хүчирхийллээс дүрвэсэн 3000 орчим хүний гэр болжээ гэж Африканьюс телевиз мэдээлжээ.
Сургууль 2024 оноос хойш хоргодох байр болж, коридорууд нь нийтийн амьдрах орон зай болсон байна. Оршин суугчид жижиг бараа зарж, эмэгтэйчүүд усны савны дэргэд дараалалд зогсож, нийтийн гал тогоонд хоол хийдэг.
44 настай хуучин багш Мишель эхнэр, гурван хүүхэд болон өөр 36 хүнтэй нэг ангид амьдарч байна. Зэвсэгт этгээдүүд хорооллыг нь дээрэмдэж, байшингуудыг шатаасны дараа тэд гэрээсээ дүрвэжээ.
«Бидний эцсийн зорилго бол нүүх, хүн гэртээ л сайхан байдаг» гэж Мишель хэлсэн байна.
Тус гэр бүл хүнсний болон мөнгөн тусламж авсан бөгөөд үүнгүйгээр амьд үлдэхгүй байсан гэж тэрбээр ярьжээ. Нийтийн гал тогоонд 500 гаруй килограмм будаа чанаж байгаа ч олон хүний хувьд энэ нь өдрийн цорын ганц хоол болдог аж.
Гаитид 1.5 сая орчим хүн буюу хүн амын 12 орчим хувь нь гэр орноо орхисон бөгөөд өнгөрсөн хичээлийн жилд хүчирхийллийн улмаас 1600 гаруй сургууль хаагджээ.
4.2 сая хүнд туслах зорилготой найман зуун наян сая долларын хүмүүнлэгийн тусламжийн төлөвлөгөөний дөнгөж 49 хувь нь санхүүжсэн байна.
