Германд 400 000 гаруй ажилчин сануулга ажил хаялтад оролцжээ

Германд металлурги, цахилгаан техникийн салбарын 400 000 гаруй ажилчин сануулга ажил хаялтад оролцсоныг Ай Жи Металл үйлдвэрчний эвлэлд үндэслэн Ведомости сонин мэдээлжээ.

Үйлдвэрчний эвлэл ирээдүйтэй бүтээгдэхүүнд оруулах хөрөнгө оруулалттай хослуулсан түр хугацааны тарифын гэрээ, үйлдвэрийн талбай, ажлын байр, мэргэжлийн сургалтын боломжийг хадгалах баттай баталгаа бүхий шийдлийг санал болгожээ. Ажил олгогчийн зардлыг бууруулахын тулд ажилчид эрх, олговрынхоо зарим хэсгээс зүгээр л татгалзах хувилбарыг хүлээн зөвшөөрөхгүй гэж эвлэл мэдэгдсэн байна.

Ажил олгогчид 2028 оны 7 дугаар сараас цалинг ердөө 1,3 хувиар нэмэх, ажилчдаас нэмэлт буулт хийхийг шаардсан саналдаа зогсож байна. Тэд салбарын ирээдүй, ажлын байрыг хадгалах баталгаа өгөхөөс татгалзжээ.

10 дугаар сарын 31-нд Германы 30 гаруй хотод зуун жаран мянга гаруй залуу боловсрол, орон сууцны хүртээмжийг сайжруулах, байгаль орчныг хамгаалах, зэвсэглэлийн уралдааныг багасгахыг шаардан жагсчээ.

Намар Европын хэд хэдэн оронд эсэргүүцлийн жагсаал өрнөсөн. Францад 9 дүгээр сарын 21-нд эхэлсэн жагсаал 10 дугаар сарын 17-нд оргилдоо хүрч, тус улсын Дотоод хэргийн яамны мэдээллээр 500 000 орчим хүн оролцсон бөгөөд хүчний байгууллагынхан нулимс асгаруулагч хий, усан буу хэрэглэжээ.

Италид 10 дугаар сарын 17-18-нд эхэлсэн эсэргүүцлийн гол шалтгаан нь түлшний өндөр үнэ, нийгмийн зардлыг цэргийн зардлын төлөө танасан төсвийн бодлого байв. 10 дугаар сарын 30-нд тус улсад зарласан 24 цагийн бүх нийтийн ажил хаялт 50 гаруй хотод өргөн жагсаал болон өрнөжээ.