Украины 400 гаруй нисгэгчгүй онгоц Оросын бүс нутгуудад довтолж, Орёл, Саратовын үйлдвэрүүдэд гал гарчээ

Украины довтолгооны дараа Орёл хотын цэргийн техникийн эд анги үйлдвэрлэдэг «Протон-Электротекс» үйлдвэрт гал гарсныг Астра хэвлэл гэрчүүдийн бичлэгт дүн шинжилгээ хийж тогтоосныг Медуза сайт мэдээлжээ.

Орёл мужийн Засаг дарга Андрей Клычков хотын Советский дүүрэг дэх үйлдвэрт довтолгоо болсныг баталсан ч аль үйлдвэр болохыг нэрлээгүй. «Дайсны их хэмжээний пуужингийн довтолгоог няцаах үед үйлдвэрийн байр хэсэгчлэн гэмтсэн» гэж тэрбээр мэдэгджээ.

Саратов мужид иргэний дэд бүтцийн байгууламж гэмтсэн гэж Засаг дарга Роман Бусаргин мэдэгдсэн. Астрагийн дүн шинжилгээгээр энэ нь «Роснефть» компанийн газрын тос боловсруулах үйлдвэр ажээ.

Газрын тос боловсруулах үйлдвэр рүү чиглэсэн нэг дрон авто сэлбэгийн дэлгүүрийн барилгын дэргэд дэлбэрсэн байна.

Оросын Батлан хамгаалах яамны мэдээлснээр агаарын довтолгооноос хамгаалах хүчин шөнийн турш Брянск, Белгород, Воронеж, Курск зэрэг арван муж, өөртөө нэгтгэсэн Крым, Азовын болон Хар тэнгисийн дээгүүр Украины 411 нисгэгчгүй онгоцыг саатуулж эсвэл устгажээ.

«Протон-Электротекс» үйлдвэр өмнө нь ч Украины довтолгоонд өртөж байсан. 10 дугаар сарын 23-ны цохилтын дараа томоохон гал гарч, таван хүн амь үрэгдэж, 19 хүн шархадсан юм.

Саратовын газрын тос боловсруулах үйлдвэр Оросын хамгийн эртний үйлдвэрүүдийн нэг бөгөөд 2024 оны мэдээллээр тус улсын нийт газрын тос боловсруулалтын 2,2 хувийг эзэлж байжээ.