Германы алсын тусгалтай пуужин цөмийн хурцадал өдөөхөөс Франц болгоомжилж байна гэж Файнэншл Таймс мэдээлжээ

Германы Оросын нутгийн гүнд бай онох чадалтай алсын тусгалтай пуужин бүтээж буйг Москва буруу ойлгож, цөмийн хариу үйлдэл үзүүлж мэдэх тул Франц санаа зовж байгааг Файнэншл Таймс сонин эх сурвалжуудыг иш татан мэдээлжээ. Энэ тухай Ведомости сонин мэдээлэв.

Парис Германы зэвсэгт хүчнээс ийм зэвсгийг ашиглах нөхцөлийг тодруулахыг хүсч, Францын цөмийн саатуулах стратегийн жишгээр сургаал боловсруулахыг дэмжиж байна. Олон нийтэд зарласан тодорхой зарчмууд Орос дохиог буруу тайлбарлахаас сэргийлнэ гэж тус сонины нэг эх сурвалж үзжээ.

Германы зэвсэгт хүчин 500-аас 2000 км тусгалтай хуурай газрын пуужингийн систем бүтээж байна. Германы нэгэн өндөр албан тушаалтан Европын холбоонд нийтлэг сургаал, хурцадлын үе шатын нэгдмэл ойлголт хэрэгтэй гэдэгтэй Берлин санал нэг байгааг мэдэгджээ.

11 дүгээр сарын 2-нд Герман, Их Британи 2000 гаруй км тусгалтай хоёр шинэ төрлийн пуужин хамтран бүтээхээр төлөвлөж байгаа гэж мэдээлж байсан юм. Политико сайтын мэдээлснээр, Лондон намхан нисдэг далавчит пуужин бүтээж, эхний хувилбарыг 2032 он гэхэд байлдааны бэлэн болгох бол Берлин гиперсоник пуужин бүтээх юм. Германы төсөвт энэ зорилгоор 9 тэрбум гаруй евро тусгажээ.

Блүмберг 10 дугаар сарын 23-нд Герман 1 тэрбум гаруй еврогийн үнэтэй, 2000 гаруй км тусгалтай 1000 Энтем далавчит пуужин худалдан авах хэлэлцээ хийж байгааг мэдээлж байжээ.