Их Британийн тагнуулын байгууллага олон мянган санах ойн төхөөрөмж хаана байгааг мэдэхгүй байна

Их Британийн тагнуулын байгууллага болох Засгийн газрын харилцаа холбооны төв штаб нууц мэдээлэл агуулж болзошгүй олон мянган хадгалах төхөөрөмж хаана байгааг тайлбарлаж чадахгүй байгааг албан ёсны хяналтын байгууллага тогтоожээ. Энэ тухай Политико Юроп мэдээлэв.

Тагнуулын байгууллагууд тагнах эрхээ хэрхэн хэрэглэж буйд хяналт тавьдаг Мөрдөн шалгах эрх мэдлийн комиссарын пүрэв гарагт нийтэлсэн тайланд флаш санах ой, хатуу диск, санах ойн карт зэрэг нэлээд олон төхөөрөмж сураггүй байгааг дурджээ.

«Би тэдэнд анх энэ асуудлыг хөндсөнөөс хойш олон жил өнгөрсөн ч нууц мэдээлэл агуулж болох зөөврийн хадгалах төхөөрөмжүүд юу болсныг тус байгууллага надад хэлж чадахгүй хэвээр байна» гэж комиссар Брайан Левесон мэдэгджээ.

Төхөөрөмжүүдэд 2016 оны Мөрдөн шалгах эрх мэдлийн тухай хуулийн дагуу цуглуулсан, тухайлбал таслан авсан цахим шуудан, мессеж, утасны яриа, хүмүүсийн компьютер, утаснаас авсан мэдээлэл байж магадгүй аж.

Тайланд дурдсанаар байгууллага төхөөрөмжийн тоог «олон мянга» гэж тооцоолж байгаа бөгөөд хэд нь алдагдсаныг тогтоохоор ажиллаж байна.

Байгууллагын хэвлэлийн төлөөлөгч зөөврийн хадгалах төхөөрөмжийн удирдлагын систем нь өмнө нь хангалттай найдвартай биш байсныг хүлээн зөвшөөрч, хяналтын байгууллагын бүх зөвлөмжийн дагуу арга хэмжээ авсан гэж мэдэгджээ.

Өнгөрсөн жил хяналтын байгууллага тус байгууллага болон дотоодын тагнуулын алба нэлээд олон хадгалах төхөөрөмжийг олж чадахгүй байгааг, тэдгээрийн зарим нь «туйлын нууц» ангиллын мэдээлэл агуулж болзошгүйг ил болгосон юм.