Европын холбоо гишүүн орнуудыг сошиал сүлжээний үндэсний хоригоо нэг жил зогсоохыг үүрэг болгожээ

Европын комисс ЕХ даяар нэгдсэн дүрэм боловсруулахын тулд насанд хүрээгүй хүмүүсийн сошиал сүлжээ ашиглахыг хязгаарлах үндэсний хуулиудыг түр зогсоохыг гишүүн орнуудад үүрэг болгожээ. Энэ тухай Политико Юроп мэдээлэв.

«Комисс ирээдүйн нэгдсэн дүрэмтэй давхардах аливаа үндэсний хуулийн төслийг 12 сараар хойшлуулахаар шийдлээ» гэж Европын комиссын хэвлэлийн төлөөлөгч Томас Ренье пүрэв гарагт сэтгүүлчдэд хэлжээ.

Пүрэв гарагт хуулиа зогсоох тушаал авсан анхны улс болох Австри энэ шийдвэрийг шүүмжилжээ. «Брюссель өөрөө Европын эцсийн шийдлийг танилцуулаагүй байж гишүүн орнуудыг үндэсний хууль батлахад саад болох нь хүлээн зөвшөөрөгдөхгүй» гэж Австрийн Төрийн нарийн бичгийн дарга Александр Пролль хэлсэн байна.

Австри долдугаар сард 14-өөс доош насны хүүхдэд сошиал сүлжээ ашиглахыг хориглох хуулийн төслөө ЕХ-ны хуульд нийцэж буй эсэхийг шалгуулахаар Комисст хүргүүлсэн юм. Шадар канцлер Андреас Баблер 12 сарын түр зогсоолт дуусмагц хоригоо нэн даруй хэрэгжүүлэхийн тулд хууль тогтоох ажлаа үргэлжлүүлнэ гэж мэдэгджээ.

ЕХ есдүгээр сард санал болгосон хүүхдийн тухай хуулиар ихэнх тохиолдолд 13-аас доош насны хүүхдэд сошиал сүлжээ ашиглахыг хориглож, 15-аас доош насны өсвөр үеийнхний хандалтыг эрс хязгаарлахаар заажээ.

Европын холбооны хуулийн төслийн өмнө өөрийн хуулиа баталсан Грек 15-аас доош насныханд зориулсан хоригоо хадгалж үлдэх магадлалтай байна.