Индонезид Ерөнхийлөгчийн яриаг чагнасан хэрэгт дөрөв дэх сэжигтнийг тогтоожээ
Чагналтын хэрэг Ерөнхийлөгч Прабово Субианто болон түүний өмнөх үеийн Жоко Видодогийн хоорондын хагарлыг ил гаргажээ.
Индонезийн цагдаа Ерөнхийлөгч Прабово Субиантогийн яриаг чагнасан хэрэгт дөрөв дэх сэжигтнээр хууль сахиулах байгууллагын ахлах албан тушаалтныг нэрлэсэн гэж Аль Жазира телевиз мэдээлжээ.
Орон нутгийн хэвлэлүүд түүнийг Сламет Улианди гэж тодорхойлсон байна. Мөрдөн байцаагчдын хэлснээр тэрбээр 2021-2026 онд Эрүүгийн мөрдөн байцаах газрын мэдээллийн технологийн хэлтсийг удирдаж байхдаа чагнахыг зөвшөөрсөн гэх аж.
«Нөгөө хоёр сэжигтэн чагнахын өмнө түүнээс зөвшөөрөл авдаг байсан» гэж кибер гэмт хэргийн хэлтсийн дарга Сухерманто хэлжээ. Эрүүл мэндийн байдлаас нь болж сэжигтнийг хараахан саатуулаагүй байна.
Өмнө нь мягмар гарагт цагдаагийн гурван ахлах офицерыг баривчилсан бөгөөд тэдний дунд Видодогийн үнэнч дэмжигч гэгддэг, Прабовогийн тамгын газрын дарга, үндэсний цагдаагийн газрын экс дарга Листьо Сигит Прабово байжээ.
Цагдаа чагналтын сэдлийг шалгасаар байгаа бөгөөд одоогоор 13 цагдаа, эрүүгийн болон мэдээллийн технологийн таван шинжээчээс мэдүүлэг авчээ.
Прабово 2024 онд Видодогийн бодлогыг үргэлжлүүлэгч нэр дэвшигчээр сонгуульд үнэмлэхүй ялалт байгуулж, Видодогийн хүү Гибран Ракабуминг Рака дэд ерөнхийлөгчөөр сонгогдсон юм.
Хууль тогтоогчид одоо Ракагийн эрх зүйн чадамжийг шалгах асуудлыг авч хэлэлцэж байгаа нь түүнийг албан тушаалаас нь огцруулах эхний алхам байж болзошгүй.
