Иркутскийн замын цагдаагийн байцаагч асан аюулгүй байдлын албаныхан өөрийг нь тамласан гэж ярьжээ

Иркутск мужийн Тулун хотын замын цагдаагийн байцаагч асан Виталий Гимальдинов нэгжлэгийн үеэр Холбооны аюулгүй байдлын албаны ажилтнууд түүнийг тамласан гэж ярьсан тухай ОВД-Инфо сайт «Людей Байкала» сайтыг иш татсан «Медиазона» сайтын мэдээг үндэслэн мэдээлэв. 26 настай Гимальдиновын хэлснээр 4 дүгээр сарын 13-ны өглөө зургаан цагийн орчим аюулгүй байдлын алба болон тусгай хүчний ажилтнууд гэрт нь ирсэн байна. Тэд хашаанд нь цахилгаан цохиураар цохиж утасных нь нууц үгийг шаардаж, дараа нь машинд суулгаад тамласаар гэм буруугаа хүлээхийг шаардсан гэж тэрбээр ярьжээ.

Гимальдинов тамлалтын үеэр толгойгоо хананд цохиулж ухаан алдсан гэнэ. Сэрэхэд нь ажилтнууд цахилгаан цохиурыг бэлэг эрхтэнд нь тулгаж «гэм буруугаа хүлээ» гэж шаардсан гэжээ. Мөн тэд эцэг эхийг нь ажлаас нь халахаар сүрдүүлж, түүнийг хорих байранд «эр хүний нэр төрөөс нь салгана» гэж айлгасан гэж тэрбээр ярьсан байна. Гимальдиновын эсрэг Эрүүгийн хуулийн 290 дүгээр зүйлийн 1 дэх хэсгээр хахууль авсан хэрэг үүсгэжээ. Тэрбээр буруутгалыг зохиомол гэж үзэж байна.

Өмнө нь түүний хамт ажилладаг найз Виктор Асхаев орон нутгийн замын цагдаагийн байгууллагын авлигын талаар Ерөнхий прокурорын газарт гомдол гаргажээ. Асхаевын хэлснээр үнэмлэхгүй жолоочийн овгийг мэдээллийн санд алдаатай бичсэнээр зөрчил байхгүй хүний нэр дээр бүртгэгджээ. Дарга нар нь түүний илтгэх хуудсыг устгаж, бичлэгийг арилгасан аж. Тэрбээр гомдлоо Гимальдиновын цахим шуудангаар илгээсэн юм. Аюулгүй байдлын албаныхан Асхаевыг ч баривчилж, Эрүүгийн хуулийн 272.1 дүгээр зүйлийн 3 дахь хэсгийн «г» заалтаар хувийн мэдээллийг хууль бусаар ашигласан хэрэг үүсгэсэн байна.

Асхаев ч нэгжлэгийн үеэр ажилтнууд өмдийг нь тайлж, замын цагдаагийн саваагаар хүчирхийлэхийг оролдсон гэж ярьжээ. Шүүх түүнийг дараа нь 150 мянган рублиэр торгосон юм. Асхаев эдгээр эрүүгийн хэрэг нь авлигын талаар гомдол гаргасных нь өшөө авалт гэж үзэж байна. Гимальдинов хагас жил гаруй мөрдөн шалгагдаж байгаа бөгөөд тамлалтын тухай видеог хэдэн сарын өмнө бичсэн ч одоо л нийтэлжээ.