Жүжигчин Стейси Кич 85 насандаа зүрхний өвчнөөр насан эцэслэжээ

Америкийн жүжигчин Стейси Кич зүрхний хүнд өвчинтэй удаан тэмцсэний эцэст Мягмар гарагт 85 насандаа Польшийн Магдаленка дахь гэртээ насан эцэслэсэн гэж эхнэр Малгося Томасси Кич нь мэдэгджээ. Энэ тухай Ньюсвик сэтгүүл мэдээлэв.

“Тэрбээр өвчинтэйгээ амьдралаа тодорхойлж ирсэн тэрхүү гайхалтай зориг, тэсвэр тэвчээрээрээ нүүр тулсан жинхэнэ дайчин байсан” гэж эхнэр нь Холливуд Рипортер сэтгүүлд өгсөн мэдэгдэлдээ дурджээ.

Кич 2017 оны 6 дугаар сард Чикагод зохиолч Эрнест Хемингуэйн тухай ганц хүний жүжигт тоглож байхдаа тайзан дээр зүрхний шигдээс болж, жүжиг цуцлагдсан юм.

Кич ижил нэртэй цувралд хувийн мөрдөгч Майк Хаммерын дүрээр хамгийн их алдаршсан бөгөөд Америкийн Шекспирийн жүжгийн шилдэг жүжигчдийн нэгд тооцогддог байв. Тэрбээр Бродвейд Лир хааны дүрд тоглож, Небраска зэрэг кинонд тоглосон бөгөөд 2025 онд гарсан Жей Келли кинонд Жорж Клунигийн аавын дүрийг бүтээжээ.

Түүний карьерт 1984 онд Лондонгийн Хитроу нисэх онгоцны буудалд Их Британи руу кокаин хууль бусаар оруулах гэж байгаад баривчлагдсан нь томоохон цохилт болжээ. Тэрбээр 9 сарын хорих ял авч, Рединг шоронд 6 сар суусан бөгөөд тэр үед 44 настай байв. 2013 онд хэвлүүлсэн дурсамж номдоо тэрбээр энэ үеийг амьдралынхаа “хамгийн доод цэг” гэж бичжээ.

Суллагдсаныхаа дараа тэрбээр кокаинд донтсон тухайгаа олон нийтэд ил ярьж, Конгрессод мэдүүлэг өгч, коллеж, нөхөн сэргээх төвүүдээр явж туршлагаасаа хуваалцдаг байв.

Жоржиа мужийн Саванна хотод төрсөн Кич Калифорнийн их сургууль, Йелийн драмын сургууль, Лондонгийн хөгжим, драмын урлагийн академид суралцжээ. Тэрбээр Бродвейн жүжигт Буффало Биллийн дүрээр Тони шагналд нэр дэвшиж, телевизийн мини цувралд Хемингуэйн дүрээр Алтан бөмбөрцөг шагнал хүртсэн юм. Түүний эхнэр, Шэннон, Каролина хоёр хүүхэд нь үлджээ.